ކުޅުދުއްފުށީ ސިޓީ ކައުންސިލުން އައު ނޮލެޖް ސެންޓަރެއް ޤާއިމްކޮށް، އާންމު ކުތުބުޚާނާ ރަސްމީކޮށް ހުޅުވައިފިއެވެ.
މި ކުތުބުޚާނާ ހުޅުވުމަށް ރޭ ބޭއްވި ހަފްލާގައި އެތަން ރަސްމީކޮށް ހުޅުވައިދެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ކުޅުދުއްފުށީ ކެމްޕަހުގެ އެސިސްޓެންޓް ޕްރޮފެސަރ ޑރ. މުޙައްމަދު ޢުމަރެވެ. ރަސްމިއްޔާތުގައި ވާހަކަފުޅު ދައްކަވަމުން، ޑރ. މުޙައްމަދު ޢުމަރު ފޮތްތެރިކަމާއި ފޮތްކިޔުމުގެ މުހިންމުކަމަށް އަލިއަޅުވާލެއްވިއެވެ. އަދި ހަރުދަނާ މުޖުތަމަޢުއެއް ބިނާކުރުމުގައި ކުތުބުޚާނާތަކުގެ މުހިންމު ދައުރު ފާހަގަކުރެއްވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން، ކުޅުދުއްފުށީ ސިޓީގެ މޭޔަރު މުޙައްމަދު އާޠިފް ވިދާޅުވީ މިއީ ހަމައެކަނި ފޮތްތަކެއް ބަހައްޓާފައިވާ އިމާރާތެއް ނޫންކަމަށާއި، މިއީ މަޢުލޫމާތާއި ޢިލްމުގެ ޚަޒާނާއެއް ކަމަށެވެ. އަދި މި ކުތުބުޚާނާއަކީ އަންނަން އޮތް ޖީލުތަކުގެ މުސްތަގުބަލު ބިނާކުރުމަށް ކުރެވޭ ވަރަށް ބޮޑު މަސައްކަތެއްކަަމަށް މޭޔަރު އާޠިފް ވިދާޅުވިއެވެ.
މި ނޮލެޖް ސެންޓަރު ތަރައްޤީކުރުމަށް ސިޓީ ކައުންސިލުގެ ބަޖެޓުން 2 މިލިޔަން ރުފިޔާއަށްވުރެ އިތުރު އަދަދެއް ޚަރަދުކޮށްފައިވެއެވެ. މި މަރުކަޒުގައި ކުތުބުޚާނާގެ އިތުރުން، ދެ ސްޓަޑީ ރޫމަކާއި، ނަފްސާނީ އެހީތެރިކަން ބޭނުންވާ ފަރާތްތަކަށް ޚާއްޞަކޮށްފައިވާ ވެލްނަސް ރޫމެއްވެސް ޤާއިމްކޮށްފައިވެއެވެ.
