އީޖާދީ އަދި ފަންނުވެރި ދާއިރާތަކަށް އަމާޒުކޮށް، ކްރިއޭޓިވް އިކޮނޮމީ ފަންޑެއް ދިވެހި ސަރުކާރުން ތަޢާރަފުކޮށްފިއެވެ.
މި ފަންޑުން ތިން ލައްކަ ރުފިޔާ ހަމަޔަށް މާލީ އެހީތެރިކަން ދޭން ސަރުކާރުން ވަނީ ނިންމައިފިއެވެ.
ރޭ ދަރުބާރުގޭގައި ބޭއްވި ރަސްމިއްޔާތެއްގައި މި ފަންޑު ރަސްމީކޮށް އިފްތިތާޙުކުރެއްވީ އިޤްޤްތިޞާދީ ތަރައްޤީއާއި ވިޔަފާރީގެ ވަޒީރު އަލްފާޟިލް މުޙައްމަދު ސަޢީދެވެ.
ކުރިއަށް އޮތް މަހުގެ 10 ވަނަ ދުވަހު، މި ފަންޑުގެ ދަށުން މާލީ އެހީތެރިކަމަށް އެދި ހުށަހެޅުމުގެ ފުރުސަތު ހުޅުވިގެންދާނެ ކަމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ހާމަކުރައްވައިފިއެވެ. މި ފަންޑަށް އެދި ހުށަހަޅާ ކޮންމެ ފަރާތަކަށް 50,000 ރުފިޔާއާއި 300,000 ރުފިޔާއާ ދެމެދުގެ އަދަދަކުން މާލީ އެހީތެރިކަން ފޯރުކޮށްދެވޭނެ ކަމަށް އެ ފަރާތުން މަޢުލޫމާތު ދެއްވިއެވެ.
މި ފަންޑުގެ ދަށުން އެހީތެރިކަން ފޯރުކޮށްދެވޭނީ ހަތަރު މައިގަނޑު ދާއިރާއަކަށެވެ. އެއީ އެއީ ފިލްމް އުފެއްދުމަށާއި، މިއުޒިކް އުފެއްދުމަށާއި، އާޓްސް އެންޑް ކްރާފްޓް ދާއިރާއާއި ޑިޖިޓަލް ކޮންޓެންޓް ކްރިއޭޝަންގެ ދާއިރާ ކަމަށް ބީސީސީން ހާމަކުރިއެވެ.
މީގެ އިތުރުން، މި ފަންޑުގެ ތެރެއިން، އަންހެނުންނަށް ޚާއްޞަކޮށްގެން ސްޓާޓަޕް ލޯނުގެ ގޮތުގައި 100 މިލިއަން ރުފިޔާއަށް އެދި ހުށަހެޅުމުގެ ފުރުސަތުވެސް ހުޅުވާލެވިފައިވެއެވެ. ބީސީސީން އިތުރަށް ހާމަކުރި ގޮތުގައި، އަންނަ އަހަރު ތެރޭގައި މި ފަންޑުގެ ދާއިރާ އިތުރަށް ފުޅާކޮށް، އިތުރު ދާއިރާތަކަށް ފުރުޞަތު ހުޅުވާލެވޭނެއެވެ.
މި ފަންޑަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކްރިއޭޓިވް އިކޮނޮމީ ތަރައްޤީކުރުމުގެ ސިޔާސަތުގެ ދަށުން ޤާއިމުކުރެވުނު ފަންޑެކެވެ. މީގެ މައިގަނޑު މަޤްޞަދަކީ އީޖާދީ އަދި އުފެއްދުންތެރި ފަރާތްތަކަށް މާލީ އެހީތެރިކަން ފޯރުކޮށްދިނުމެވެ.
