އަމާޒަކީ 5 އަހަރު ތެރޭގައި 500 އިމާމުން ރާއްޖޭޏް ބޭރުން ތަމްރީން ކުރުން ކަމަށް އިސްލާމީ ކަންތަކާ ބެހޭ ވުޒީރު ޑރ. ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް މިފަދައިން ވިދާޅުވެފައިވަނީ މިއަދު ފެށުނު އިމާމުންގެ މަހާސިންތާ 2024 ފަށްޓަވަަމުންނެވެ.
މީގެއިތުރުން ޝަހީމް ވިދާޅުވީ އަމާޒަކީ މި ދައުރުގެ ކޮންމެ އަހަރަކު ރާއްޖޭން ބޭރުން 100 އިމާމުން ތަމްރީން ކުރުންކަމަށާއި ދައުރު ނިމިގެންދާއިރު 500 އިމާމުންނަށް ރާއްޖޭން ބޭރުން ތަމްރީން ދިނުންކަމަށެވެ. މީގެއިތުރުން 1000 ޒުވާން ޚަޠީބުން މި ދައުރުގެ ތެރޭގައި މައިދާނަށް ނެރުއްވުމަކީވެސް އަމާޒެއްކަމަށް އެމަނިކުފާނު ވަނީ ވިދާޅުވެފައެވެ.
މިގޮތުން މިއަހަރުގެ މިހާތަނަށް ރާއްޖޭން ބޭރުން 60 އިމާމުންނަށް ތަމްރީން ދީފައިވާއިރު، ޒުވާން ޚަޠީބުން ޕްރޮގުރާމްގެ ދަށުން 300 އަށްވުރެ ގިނަ ޒުވާން ޚަޠީބުން ތަމްރީންކޮށްފައެވެ.
މިއަދު ފެށި މި މަހާސިންތާގައި 500 އަށްވުރެ ގިނަ އިމާމުން ބައިވެރިވެފައިވާއިރު، މީގެ ތެރޭގައި އޮންލައިންކޮށް 300 އިމާމުންނާއި ހާޒިރުވެގެން ބައިވެރިވާ 208 އިމާމުން ހިމެނެއެވެ.
