ކުރީގެ ސީއީއޯ ކާރލް ސްޓަމްކެ އިސްތިއުފާ ދިނުމާ ގުޅިގެން ބޭންކް އޮފް މޯލްޑިވްސްގެ ޗީފް އެގްޒެކެޓިވް އޮފިސަރުގެ މަޤާމަށް ކުރިމަތިލުމުގެ ފުރުޞަތު އެ ބޭންކްއިން ހުޅުވާލައިފިއެވެ.
ބޭންކުން ނެރުނު އިޢުލާނެއްގައި ބުނެފައިވަނީ އެޕްލިކޭޝަން ހުށަހެޅުމުގެ ސުންގަޑިއަކީ އޮކްޓޯބަރު 7 ކަމަށެވެ.
އެޕްލިކޭޝަން ހުށަހަޅާ ފަރާތްތަކުގައި ބޭންކިންގ ދާއިރާގައި މަދުވެގެން 15 އަހަރުގެ ތަޖުރިބާ އަދި ސީނިއަރ މެނޭޖްމަންޓްގައި 5 އަހަރަށްވުރެ ގިނަ ދުވަހުގެ ތަޖުރިބާ ހުންނަންވާނެއެވެ. އަދި މާލީ ދާއިރާއިން މަތީ ތަޢުލީމީ ސަނަދެއް ހާސިލުކޮށްފައި ވާންވާނެކަމަށް ބީއެމްއެލްއިން ވިދާޅުވެފައިވެއެވެ.
މި މަޤާމަށް ހޮވޭ ފަރާތަށް ދެވޭ މުސާރަ ކަނޑައަޅާނީ ހޮވޭ ފަރާތުގެ ތަޢުލީމާއި ތަޖުރިބާއަށް ބަލައިގެންނެވެ. މުސާރައިގެ އިތުރުން ގެދޮރާއި، ކާރު އަދި މެޑިކަލް އިންޝުއަރެންސް ދެވޭނެއެވެ. ރާއްޖެއިން ބޭރުން މަސައްކަތްކުރާނަމަ ޚާއްޞަ އެލަވަންސަކާއި އަހަރަކު އެއްފަހަރު ދަތުރުކުރުމުގެ ޚަރަދު ހިމެނޭނެއެވެ. މި މަޤާމަށް އައްޔަންކުރެކުރެވޭނީ 3 އަހަރުގެ މުއްދަތަކަށެވެ.
ކުރީގެ ސީއީއޯ ކާރލް ސްޓަމްކެ މަޤާމާ ޙަވާލުވެފައިވަނީ 2022 ވަނަ އަހަރުގެ އޮކްޓޯބަރު މަހުގައެވެ. މިހާރު ބޭންކުގެ ހިންގުން ވަގުތީގޮތުން ބަލަހައްޓަމުން ގެންދަނީ ޑެޕިއުޓީ ސީއީއޯ އައިޝަތު ނޫރައްދީނެވެ.
