މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި ދެމެހެއްޓެނިވި ތަރައްގީއަށް މަސައްކަތްކުރުމުގައި ބައިނަލްއަގުވާމީ މުޖުތަމަޢުން ހަރުދަނާ ފިޔަވަޅުތަކެއް އެޅުމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ގޮވާލައްވައިފިއެވެ.
ރައީސް މިކަމަށް ގޮވާލެއްވީ އދ.ގެ އާންމު މަޖިލީހުގެ 79 ވަނަ ސެޝަނުގައި ތަގުރީރު ކުރައްވަމުންނެވެ.
ރައީސްގެ ތަގުރީރުގައި އެމަނިކުފާނު ވަނީ މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި ވައި ތަގައްޔަރުވުމާއި ދިރުންތައް ނެތިދިއުންފަދަ ކަންކަމަށް ފިޔަވަޅު އެޅުމުގައި ބައިނަލްއަގުވާމީ މުޖުތަމައުން ގުޅިގެން މަސައްކަތްކުރުމަށް ގޮވާލައްވާފައެވެ. މިކަންކަމުގެ ތެރެއިންވެސް މޫސުމަށް އަންނަ ބަދަލުތަކުގެ މައްސަލައަކީ އިންސާނިއްޔަތަށް އެންމެބޮޑު ނުރައްކަލެއް އޮތް މައްސަލަކަން ފާހަގަކުރައްވައި އެކަމުގައި ގުޅިގެން މަސައްކަތްކުރުމުގެ މުހިންމުކަން އެމަނިކުފާނު ފާހަގަކުރެއްވިއެވެ.
މީގެއިތުރުން މޫސުމަށް އަންނަ ބަދަލުތަކުގެ ސަބަބުން ގައުމުތަކުގެ އެތައް އަހަރުތަކެއްގެ ކުރިއެރުންތައް ނެތިގެންދާކަމަށާއި އަދި ގައުމުތަކުގެ ތަރައްގީގެ ކަންކަމަށް ހޭދަކުރުމަށް ހުންނަ މަދު ވަސީލަތްތައް ކުއްލި ހާދިސާތަކުގައި އެހީތެރިކަން ފޯރުކޮށްދިނުމަށާއި މޫސުމަށް އަންނަ ބަދަލުތަކަށް ހޭނުމަށް ކުރަންޖެހޭ މަސައްކަތްތަކަށް ހޭދަކުރަންޖެހޭކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. އަދި އެމަނިކުފާނު ވަނީ އެކަށީގެންވާ ވަސީލަތްތަކާއެކު އެ މައްސަލަ ހައްލުކުރުމުގެ ނިޔަތާއެކު އަދި ސައިންސްގެ މައްޗަށް ބިނާވެފައިވާ ގޮތްތަކެއް މިހާރުން މިހާރަށް ހޯދުމަށް މަސައްކަތްކުރުމަށް ގޮވާލައްވާފައެވެ.
ހަމައެއާއެކުމޫސުމަށް އަންނަ ބަދަލުތަކަށް ހޭނުމަށް ކުރެވޭ މަސައްކަތްތަކަށް އެއްބާރުލުންދީ މާލީ އެހީތެރިކަން ހަމަޖެހުމުގައި ކުރިމަތިވާ ދަތިތައް ކުޑަކުރުމުގައި އެއްބާރުލުން ދިނުމަށް މުއްސަނދި އަދި އެންމެ ގިނައިން ވިހަ މާއްދާތައް ޖައްވަށް ބޭރުކުރަމުންދާ ގައުމުތަކުން ދީފައިވާ ޔަގީންކަމާ އެއްގޮތަށް އެފަރާތްތަކުން މަސައްކަތްކޮށްދެއްވުމަށް ވެސް ރައީސް ގޮވާލެއްވިއެވެ. އަދި ކޮޕް29 އާ ބައްދަލުކުރުމަށް ބައިނަލްއަގުވާމީ މުޖުތަމައުން ތައްޔާރުވަމުންދާއިރު، މޫސުމީ ބަދަލުތަކުން އަރައިގަތުމަށް ބޭނުންވާ މާލީ ކަންކަން ހަމަޖެއްސުމަށް ކަނޑައަޅާފައިވާ އަމާޒުތައް، ބޭނުންވާ ގޮތަށް ހަމަޖެހިގެންދާނެކަން ކަށަވަރުކުރުމުގެ މުހިންމުކަން ވެސް އެމަނިކުފާނު ފާހަގަކުރެއްވިއެވެ.
އދ.ގެ އާންމު މަޖިލީހުގެ79 ވަނަ ސެޝަނުގައި ވާހަކަފުޅު ދައްކަވަމުން ރައީސް ވަނީ 2028 ވަނަ އަހަރު އަންނަންވާއިރަށް ރާއްޖެއަށް ބޭނުންވާ ކަރަންޓްގެ 33 އިންސައްތަ އިއާދަކުރަނިވި ހަކަތައިން އުފެއްދުމަށް ކަނޑައަޅާފައިވާ އަމާޒަށް ދިވެހިރާއްޖެއިން މަސައްކަތްކުރަމުންދާކަން ތަކުރާރު ކުރައްވާފައެވެ.
ރައީސްގެ ވާހަކަފުޅުގައި ދިވެހިރާއްޖޭގެ ރައްޔިތުން ދިރިއުޅުމަށް ކުރާ މަސައްކަތުގައި ކަނޑުތައް އަދާކުރާ މުހިންމު ދައުރު ފާހަގަ ކުރެއްވިއެވެ. އަދި ޕްލާސްޓިކުން ކަނޑުތައް ތަގައްޔަރުވުމުގެ މައްސަލައާ ދިރުންތައް ހިމާޔަތްކުރުމާއި ނެތި ހިނގައިދާނެކަމުގެ ބިރު ހީވެފައިވާ ދިރުންތައް ހިމާޔަތްކުރުމުގައި އިތުރު ބާރެއްލައިގެން މަސައްކަތްކުރުމަށް އެމަނިކުފާނު ގޮވާލެއްވިއެވެ. މީގެ އިތުރުން އެމަނިކުފާނު ވަނީ މުސްތަގުބަލުގެ ޖީލުތަކަށްޓަކައި މޫސުމަށް އަންނަ ބަދަލުތަކާއި ވައި ތަޣައްޔަރުވުމާއި ދިރުންތައް ނެތިދިއުންފަދަ މައްސަލަތަކުގައި ހަރުދަނާ ފިޔަވަޅުތަކެއް އެޅުމަށް ބައިނަލްއަގުވާމީ މުޖުތަމައުގެ ކިބައިން އެދިވަޑައިގެންފައެވެ.
