ކަރަންޓު ބިލު ބޮޑު ކުރުމާ ގުޅިގެން މިމަހުގެ 29 ވަނަ ދުވަހު ޕާކިސްތާންގައި ހަޅުތާލު ކުރުމަށް ޖަމާޢަތޭ އިސްލާމީން ގޮވާލައިފިއެވެ. ޖަމާޢަތޭ އިސްލާމީގެ ލީޑަރު ޙާފިޒް ނަޢީމް ޕާކިސްތާންގެ ކަންކޮޅުތަކުގައި ހަޅުތާލު ކުރުމަށް ގޮވާލެއްވީ އޭނާ ގެންގުޅުއްވާ ރައްޔިތުންނަށް ޙައްޤު ހޯދައި ދިނުމުގެ ޝިޢާރުގެ ދަށުންނެވެ. އާރީ ނިއުސްއިން ބުނެފައިވާ ގޮތުގައި ޙާފިޒް ނަޢީމް ވަނީ ސަރުކާރާއެކު މިކަމުގައި މަޝްވަރާތައް ބާއްވާފައެވެ. އަދި ސަރުކާރުން ވަނީ 45 ދުވސްތެރޭގައި މައްސަލަ ޙައްލު ކުރާނެ ކަމުގެ ޔަޤީންކަންވެސް ދީފައެވެ. ނަމަވެސް މުއްދަތު ހަމަވެގެން ދިޔައިރުވެސް ސަރުކާރަށް އެކަން ކޮށްދެވިފައެއް ނުވެއެވެ.
މި ހަޅުތާލު ޕާކިސްތާންގެ ހުރިހައި ބޮޑެތި ސިޓީތަކެއްގައި ކުރިއަށް ގެންދާނެއެވެ. އަދި އެއަށްފަހު، އަންނަ މަހުގެ 1 އާއި 7 ގައި ފަލަސްޠީނާއި ލުބުނާންގެ ތާއީދުގައި އެ ޕާޓީން ޕާކިސްތާންގެ ކަންކޮޅުތަކުގައި މުޒާހަރާ ބާއްވާނެއެވެ.
ޙާފިޒް ނަޢީމް ވިދާޅުވީ ރައްޔިތުންގެ ޚިޔާލު ހުރިގޮތް ބެލުމަށްފަހު، ކަރަންޓު ބިލު ދައްކާނީތީ ނޫނީ ނުދައްކާނީތޯ ފަހުން ނިންމާނެ ކަމަށެވެ. އަދި އަމިއްލައަށް ކަރަންޓު އުފައްދާ ފަރާތްތަކުން އަންގާ އެންގުންތަކަށް ރައްޔިތުން ބޯލަނބާލަން ނުޖެހޭ ކަމަށްވެސް އޭނާ ވިދާޅުވިއެވެ. އޭއިތުރުން 3 ދުވަހުގެ ހަޅުތާލެއް އިންތިޒާމު ކުރުމަށް ވިޔަފާރިވެރިންނާއެކު މަޝްވަރާ ކުރަމުންދާ ކަމަށްވެސް އޭނާ ވިދާޅުވިއެވެ.
