ކ. ދިއްފުށި ސްކޫލުގައި "ލެޓްސް ރީޑް އޮރިއެންޓޭޝަން އެންޑް ނެޓްވޯކިން ވޯކްޝޮޕް" އެއް މިމަހުގެ 21 ވަނަ ދުވަހު ބާއްވައިފިއެވެ.
މި ވޯކްޝޮޕަކީ ދި އޭޝިއާ ފައުންޑޭޝަނާއި މޯލްޑިވްސް ލައިބްރަރީ އެސޯސިއޭޝަން (އެމް.އެލް.އޭ) އިން ދިއްފުށީ ސްކޫލާ ގުޅިގެން ކުރިއަށް ގެންދިޔަ ޙަރަކާތެކެވެ. އޭޝިއާ ފައުންޑޭޝަނުން ބުނީ މި ވޯކްޝޮޕަކީ ސްކޫލް ލައިބްރަރީންނާއި އެހެން ގޮފިތަކުގެ ލައިބްރަރީވެރިންނަށް އަމާޒުކޮށްގެން ބޭއްވި ޙަރަކާތެއް ކަމަށެވެ.
މީގެއިތުރުން މި ވޯކްޝޮޕްގެ މަޤްޞަދަކީ ލައިބްރަރީވެރިންގެ ހުނަރު ތަރައްޤީކޮށް، މުޅި ޤައުމުގައި ކިޔެވުން އިތުރުކުރުމަށް މަގުފަހިކުރުން ކަމަށް އެ ފައުންޑޭޝަނުން ބުންޏެވެ.
ވޯކްޝޮޕްގައި "ލެޓްސް ރީޑް" އެޕްލިކޭޝަން ބޭނުންކޮށްގެން ކިޔެވުން ފަސޭހަކުރެވޭނެ ގޮތްތައް ބައިވެރިންނަށް ދަސްކޮށްދީފައިވެއެވެ. މިއީ ކިޔެވުމުގެ ޝައުޤުވެރިކަން އިތުރުކޮށް، ކުދިންގެ ކިޔެވުމުގެ ފެންވަރު މަތިކުރުމަށް އެހީތެރިވެދޭނެ ވަސީލަތެއް ކަމަށް ބެލެވެއެވެ. އަދި މިއީ ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާގެ މަސައްކަތްތަކުގެ ތެރެއިން ކުރިއަށް ގެންދެވުނު ޙަރަކާތެއްވެސް މެއެވެ.
މި ވޯކްޝޮޕް ކުރިއަށް ގެންދިޔުމުގައި އެރަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީ އާއި ދިއްފުށީ އައިލެންޑް ކައުންސިލްގެ އެއްބާރުލުންވެސް ދީފައިވެއެވެ.
