ހދ. ކުޅުދުއްފުށީގައި ވަރަށް ޒަމާނީ ޕަބްލިކް ލައިބްރަރީއެއް މިމަހުގެ 17 ވަނަ ދުވަހު ހުޅުވައިފިއެވެ.
މި ލައިބްރަރީ ހުޅުވީ ކުޅުދުއްފުށީ ސިޓީ ކައުންސިލުންނެވެ. ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި މި ލައިބްރަރީގައި 2000 އަށްވުރެ ގިނަ ފޮތް ހުންނާނެއެވެ. މި ފޮތްތައް ގަތުމަށް ސިޓީ ކައުންސިލުން 63،000 ރުފިޔާއަށްވުރެ ގިނަ ރުފިޔާ ހޭދަކޮށްފައިވެއެވެ. މީގެ އިތުރުން ވިޔަފާރިތަކާއި ހައިކޮމިޝަންތަކާއި ބައެއް އިދާރާތަކާއި އަދި އާންމު ފަރާތްތަކުންވެސް މި ކުތުބުހާނާއަށް ފޮތް ހަދިޔާކޮށްފައިވެއެވެ.
މި ލައިބްރަރީގެ މެންބަރަކަށް ވުމަށް އެދޭ ފަރާތްތަކުން "ކުޅުދުއްފުށި ޕަބްލިކް ލައިބްރަރީގެ މެންބަރަކަށް ވުމަށް އެދޭ ފޯމު" ފުރިހަމަކޮށް، ފޯމާއެކު ހުށަހަޅަންޖެހޭ ތަކެތި ހަމަކުރުމަށްފަހު ލައިބްރަރީއަށް ހުށަހަޅަންޖެހެއެވެ. މެންބަރޝިޕް ހެއްދޭނީ މަދުވެގެން 3 މަހުގެ މުއްދަތަށެވެ. 18 އަހަރުން ދަށުގެ ކުދިންނަށް މެންބަރަކަށް ވުމަށް އެއްވެސް ފީއެއް ނުނެގޭނެއެވެ.
ލައިބްރަރީ ހުޅުވުމުގެ ރަސްމިއްޔާތުގައި ކުޅުދުއްފުށީ ސިޓީގެ މޭޔަރު އާތިފް އާއި ޑެޕިއުޓީ މޭޔަރު އަލީ އަހުމަދު އަދި ކައުންސިލް މެންބަރުންނާއި ޑެޕިއުޓީ މިނިސްޓަރު މުހައްމަދު އަހުމަދާއި ޕްރިންސިޕަލުންނާއި އަތޮޅު ކައުންސިލް މެންބަރުން އަދި މުއައްސަސާތަކުގެ ވެރިން ބައިވެރިވެވަޑައިގެންނެވިއެވެ.
މި ޒަމާނީ ލައިބްރަރީ ހުޅުވުމާއެކު، ކުޅުދުއްފުށީ ރައްޔިތުންނަށް ވަރަށް ގިނަ ޚިދުމަތްތަކެއް ލިބިގެންދާނެކަމަށް ބެލެވެއެވެ. މިއީ އެ ސަރަހައްދުގެ ތަޢުލީމީ ދާއިރާއަށް ލިބިގެންދިޔަ ވަރަށް ބޮޑު ކުރިއެރުމެއް ކަމުގައި ފާހަގަކުރެވެއެވެ.
