އިސްލާމިކް ޔުނިވަރސިޓީ އޮފް ދަ މޯލްޑިވްސް (އައި.ޔޫ.އެމް) އިން އިންތިޒާމުކޮށްގެން ބާއްވާ އިންޓަރނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް (އައި.ސީ.އައި.އޭ) ގެ ނުވަ ވަނަ ކޮންފަރެންސް ފެށުމުގެ ރަސްމިއްޔާތު މިނިސްޓަރ އޮފް އެޑިޔުކޭޝަން ޑރ. އިސްމާޢީލް ޝަފީޢު ޝަރަފުވެރިކޮށްދެއްވައިފިއެވެ.
ދެ ދުވަހުގެ މުއްދަތަށް ކުރިއަށްދާ މި ކޮންފަރެންސްގައި ރާއްޖެއާއި ރާއްޖެއިން ބޭރުގެ 402 ބައިވެރިން ބައިވެރިވެފައިވާކަމަށް އައި.ޔޫ.އެމް އިން މަޢުލޫމާތު ދެއެވެ. މީގެ އިތުރުން މި ކޮންފަރެންސްއަށް 113 ދިރާސާ ކަރުދާސް ހުށަހަޅާފައިވާކަމަށްވެސް އެ ޔުނިވަރސިޓީން ބުނެއެވެ.
ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޑރ. އިސްމާޢީލް ޝަފީޢު ވިދާޅުވީ ސައިންޓިފިކް ޢިލްމަކީ ތަޢުލީމުގެ އެންމެ މަތީ ހަރުފަތުގެ ބިންގާ ކަމަށެވެ. އަދި އޭގެ ސަބަބުން ހަރުދަނާ ސިޔާސަތުތައް އެކުލަވާލުމަށް ވެސް ފަސޭހަވެގެންދާ ކަމަށް މިނިސްޓަރ ފާހަގަކުރެއްވިއެވެ. މީގެ އިތުރުން މި ކޮންފަރެންސްގެ ސަބަބުން ބައިވެރިންގެ ވިސްނުން މަތިވެ، އާ ޚިޔާލުތައް ނެރެވޭނެ ކަމުގެ ޔަޤީންކަން އޮތްކަމަށްވެސް މިނިސްޓަރ ވިދާޅުވިއެވެ.
މި ރަސްމިއްޔާތުގައި މިނިސްޓަރ ވަނީ އައި.ޔޫ.އެމްގެ ޕޯސްޓް ގްރެޖުއޭޓް ލައުންޖާއި، ދެ ރިސާޗް ޖާނަލް އިފުތިތާހުކޮށްދެއްވާފައެވެ. މި ކޮންފަރެންސްގެ ސަބަބުން ރާއްޖޭގެ ތަޢުލީމީ ދާއިރާއަށް އިތުރު ކުރިއެރުންތަކެއް ލިބިގެންދާނެ ކަމަށް ތަޢުލީމީ ދާއިރާގެ މާހިރުން ދެކެއެވެ. ސެޝަން ފުހެލާ
