ދިވެހިރާއްޖޭގެ އިސްލާމިކް ޔުނިވަރސިޓީ (އައިޔޫއެމް) އިން ކޮންމެ އަހަރަކު ބާއްވާ އިންޓަރނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް (އައިސީއައިއޭ) 2024 ނިންމުމުގެ ރަސްމިއްޔާތު މިދިޔަ އާދީއްތަ ދުވަހުގައި ބާއްވައިފިއެވެ.
ކޮންފަރެންސަށް ހުށަހެޅުނު ރިސާޗް ޕޭޕަރުތަކުގައި ދިވެހިރާއްޖޭގެ ތަޢުލީމީ ދާއިރާއާއި ޤާނޫނީ ދާއިރާ ފަދަ ތަފާތު އެތައް މުހިއްމު ދާއިރާތަކުގެ މައްޗަށް ވަނީ އަލިއަޅުވާލާފައެވެ.
އައިޔޫއެމްއިން ބާއްވާ މި ކޮންފަރެންސްގެ މައިގަނޑު އަމާޒަކީ ދުނިޔޭގެ އެކި ކަންކޮޅުތަކުގެ ތަފާތު އެކި ދާއިރާތަކުގެ ތަޖުރިބާކާރު، ޢިލްމީ ބޭފުޅުން އެއްތަންވެ، އެބޭފުޅުންގެ ޢިލްމު ހިއްސާކޮށް، ތަޢުލީމީ ދާއިރާގެ އިތުރުން އެހެނިހެން ދާއިރާތަކަށް ކުރިއެރުން ހޯދުމެވެ.
މި ކޮންފަރެންސަކީ އައިޔޫއެމްއިން ކޮންމެ އަހަރަކު ބާއްވާ މުހިއްމު ކޮންފަރެންސެކެވެ. އަދި މިފަދަ ކޮންފަރެންސްތަކުން ޤައުމުގެ ތަރައްޤީއަށް މުހިއްމު ހިއްސާއެއް ކުރާނެއެވެ.
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން މަޢުލޫމާތު ދެއްވިގޮތުގައި، މި އަހަރުގެ ކޮންފަރެންސްގައި ޖުމްލަ 402 ބޭފުޅުން ބައިވެރިވެފައިވެއެވެ. އަދި މި ކޮންފަރެންސަށް 113 ރިސާޗް ޕޭޕަރު ހުށަހަޅާފައިވާކަމަށް ވުޒާރާއިން ބުނެފައިވެއެވެ.
