މާލީ ވުޒާރާގެ މުވައްޒަފުން ވަނީ އަލަށް ޢައްޔަންކުރެވުނު މިނިސްޓަރ އޮފް ފިނޭންސް، މޫސާ ޒަމީރަށް މިއަދު ވަރަށް ހޫނު މަރުޙަބާއެއް ދަންނަވައިފައެވެ.
މިނިސްޓްރީ އޮފް ފިނޭންސްއިން މަޢުލޫމާތު ދެއްވިގޮތުގައި، މިއަދު ހެނދުނު މިނިސްޓަރ ޒަމީރު އޮފީހަށް ވަޑައިގަތުމާއެކު މި ވުޒާރާގެ އެންމެހައި މުވައްޒަފުން އެކުވެ ވަނީ މިނިސްޓަރަށް ރަތް ދޫލައިގެ މަރުޙަބާއެއް ދަންނަވައި، މިނިސްޓަރ ޒަމީރާ ސަލާމް ލާމް ކުރައްވާފައެވެ.
ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، މިނިސްޓަރ އޮފް ފިނޭންސްގެ މަޤާމަށް މޫސާ ޒަމީރު ޢައްޔަންކުރެއްވީ އިއްޔެއެވެ. މި ޢައްޔަންކުރެއްވުމާ ގުޅިގެން، މިއަދު މިނިސްޓަރ ޒަމީރު ވަނީ އެމަނިކުފާނުގެ އައު މަޤާމުގެ މަސައްކަތް ފަށްޓަވައިފައެވެ.
މިނިސްޓްރީގެ މުވައްޒަފުން މިނިސްޓަރަށް މަރުޙަބާ ދެންނެވުމުގެ އިތުރުން، އައު މިނިސްޓަރާއެކު މަސައްކަތްކުރުމަށް ވަރަށް ބޮޑަށް އުފާކުރާކަން ފާޅުކޮށްފައިވެއެވެ. މިނިސްޓަރ ޒަމީރުގެ ލީޑަރޝިޕްގެ ދަށުން ޤައުމުގެ މާލީ ދާއިރާ އިތުރަށް ކުރިއަރައި ދިއުމަށް މުވައްޒަފުން އުންމީދުކުރާކަންވެސް މިނިސްޓްރީން ހާމަކުރެއްވިއެވެ.
