އިސްލާމީ މަރުކަޒުގެ މުންނާރު ކައިރީގައި އޮންނަ މަސްފެންގަނޑު ހެދުމަށް ކުރި އިއުލާން ބާތިލުކުރަން އަންގާފައިވާ ކަމަށް އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އެމަނިފާނު މިހެން ވިދާޅުވީ މިއަދު "އެކްސް" ގައި ކުރެއްވި ޕޯސްޓެއްގައެވެ.
މި ޕޯސްޓަގައި މިނިސްޓަރ އިތުރަށް ވިދާޅުވީ މި ވަގުތު ރާއްޖެ އޮތް ހާލަތުން އެ ބާވަތުގެ ކަންކަން ކުރުމަކީ އެންމެ މުނާސަބު ކަމަކަށް ނުވާތީ ކަމަށެވެ.
ޝަހީމް ވިދާޅުވީ އަސްލު އެ ފެންގަނޑަކީ މަރުކަޒު ބިނާކުރި އިރުން ފެށިގެން މުންނާރު ތިރީގައި އޮތް ފެންގަނޑެއް ކަމަށާއި އެތަން މަރާމާތުކުރުމުގެ މަސައްކަތް ކުރިއަށްދާ ކަމަށެވެ.
އިސްލާމިކް މިނިސްޓްރީ އިން ކުރި މި އިއުލާން ބާތިލުކުރަން ނިންމާފައި ވާއިރު، މަސްފެންގަނޑު ތައްޔާރު ކުރަން ބީލަން ހުށަހެޅުމަށް ހުޅުވައިލީ ކުދި އަދި މެދުފަންތީގެ ވިޔަފާރިތަކަށެވެ.
އިސްލާމީ މަރުކަޒަށް 40 އަހަރު ފުރޭތީ މަސްފެންގަނޑެއް ހަދަން އިސްލާމިކް މިނިސްޓްރީން އިއުލާނު ކުރެއްވީ އިއްޔެ ހަވީރެވެ.
