މިނިސްޓަރ އޮފް ފިނޭންސް މޫސާ ޒަމީރު، މިއަދު މާލީ ވުޒާރާގެ އެންމެހައި މުވައްޒަފުންނާ ބައްދަލުކުރައްވައިފިއެވެ.
މި ބައްދަލުވުމުގައި މިނިސްޓަރ ޒަމީރު ވަނީ ވުޒާރާގެ މުހިންމުކަމާއި މުވައްޒަފުންގެ ދައުރުގެ މައްޗަށް އަލިއަޅުވާލައްވާފައެވެ.
މި ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ޒަމީރު ވިދާޅުވީ، މާލީ ވުޒާރާއަކީ ވަރަށް ގިނަ މުހިންމު މަސައްކަތްތަކެއް ކުރައްވާ ވުޒާރާއެއް ކަމަށާއި، އެންމެން އެކުގައި މަސައްކަތް ކޮށްގެން ރައްޔިތުންނަށް ޚިދުމަތްތެރި ވުޒާރާއަކަށް މި ވުޒާރާ ވާނެކަމުގެ ޔަޤީންކަން އޮތް ކަމަށެވެ. އަދި ކުރިން މާލީ ވަޒީރުގެ މަޤާމުގައި ހުންނެވި ޑރ. މުޙައްމަދު ޝަފީޤުގެ މަސައްކަތްޕުޅުތަކަށް ޝުކުރު ދަންނަވާ ކަމުގައިވެސް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ޒަމީރު އިތުރަށް ފާހަގަކުރެއްވި ގޮތުގައި، ވުޒާރާއެއްގެ ޙަޤީޤީ މަސައްކަތް ކުރައްވަނީ އެ ވުޒާރާއެއްގެ މަދަނީ މުވައްޒަފުންނެވެ. އަދި ކުރިއަށް އޮތް ދުވަސްތަކުގައި މުވައްޒަފުންގެ އެއްބާރުލެއްވުމާއެކު ރާއްޖޭގެ މާލީ ޙާލަތު އިތުރަށް ހަރުދަނާކުރެވޭނެކަމުގެ ޔަޤީންކަން އެބައޮތް ކަމަށް މިނިސްޓަރ ވިދާޅުވިއެވެ.
މި ބައްދަލުވުމަކީ މިނިސްޓަރ ޒަމީރު މާލީ ވަޒީރުގެ މަޤާމާ ޙަވާލުވެ ވަޑައިގަތުމަށްފަހު، ވުޒާރާގެ މުވައްޒަފުންނާ ބޭއްވެވި ފުރަތަމަ ރަސްމީ ބައްދަލުވުމެވެ. މި ބައްދަލުވުމުގައި އެ ވުޒާރާގެ އިސް ވެރިންނާއި އެންމެހައި މުވައްޒަފުން ބައިވެރިވެ ވަޑައިގެންނެވިއެވެ.
