ތަޢުލީމު ހާޞިލުކުރުމަށް ރާއްޖެއިން ބޭރަށް ފުރާ ދަރިވަރުން، އެ ޤައުމެއްގައި ހުންނަ ރާއްޖޭގެ އެންބަސީގައި ރަޖިސްޓްރީވުމަށް މިނިސްޓްރީ އޮފް ފޮރިން އެފެއާޒްގެ ސެކެޓްރީ، ބައިލޭޓްރަލް، ޑރ. ހާލާ ހަމީދު އިލްތިމާސްކުރައްވައިފިއެވެ.
ޑރ. ހާލާ މިފަދައިން ވިދާޅުވެފައިވަނީ މިއަދު މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ބޭއްވި ހަފްލާއެއްގައެވެ. މި ހަފްލާއަކީ ތުރުކީއިން ދިވެހި ދަރިވަރުންނަށް ލިބިފައިވާ ސްކޮލަޝިޕްތަކުގައި ކިޔެވުމަށް ފުރުޞަތު ލިބި، ފުރުމަށް ހަމަޖެހިފައިވާ ދަރިވަރުންނަށް ބޭއްވުނު ހަފްލާއެކެވެ.
ޑރ. ހާލާ ވިދާޅުވީ ތަޢުލީމު ހާޞިލުކުރުމަށް ފުރާ ދަރިވަރުން އެންބަސީގައި ރަޖިސްޓްރީވުމަކީ ވަރަށް މުހިންމު ކަމެއް ކަމަށެވެ. އަދި މިގޮތަށް ރަޖިސްޓްރީވުމުން، ދަރިވަރުންނަށް ދިމާވާ ކަންކަމުގައި އެންބަސީއިން އެހީތެރިކަން ފޯރުކޮށްދީ މުޢާމަލާތްކުރުމަށް ފަސޭހަވެގެންދާނެ ކަމަށްވެސް އެކަމަނާ ފާހަގަކުރެއްވިއެވެ.
މީގެއިތުރުން ހާލާ ވަނީ ތަޢުލީމު ހާޞިލުކުރުމަށް ފުރާ ދަރިވަރުން އެންބަސީގައި ރަޖިސްޓަރ ވުމަށް އިލްތިމާސް ކުރައްވާ ދަރިވަރުންނަށް ދިމާވާ ކަންކަމުގައި މުއާެމަލާތުކޮށް އެހީތެރިވުމަށް ފަސޭހަވެގެންދާނެކަމަށް ވިދާޅުވެފައެވެ.
މި ހަފްލާގައި ބައިވެރިވި ދަރިވަރުންނަށް ތުރުކީގައި ކިޔެވުމަށް ތައްޔާރުވުމާ ގުޅޭގޮތުން މައުލޫމާތު ދިނުމާއި ދަރިވަރުންގެ ސުވާލުތަކަށް ޖަވާބުދާރީވުމުގެ ފުރުސަތުވެސް ދެއްވާފައިވެއެވެ.
