ރ. ވާދޫ ކައުންސިލުން މިއަދު އިޢުލާނު ކުރި ގޮތުގައި، ލޮނުމަހާއި މަސްވެރިކަމާ ގުޅޭ މަސައްކަތްތައް ކުރުމަށް 1600 އަކަފޫޓުގެ ބިމެއް ކުއްޔަށް ދޫކުރުމަށް ނިންމައިފިއެވެ.
މި ބިން ދޫކުރުމަށް ހަމަޖެހިފައިވަނީ ބީލަމުގެ އުސޫލުންނެވެ. ވާދޫ ކައުންސިލުން މަޢުލޫމާތު ދެއްވި ގޮތުގައި، މި ބީލަމުގައި ބައިވެރިވެވޭނީ ބީލަމުގައި ރަޖިސްޓަރީ ކުރާ ފަރާތްތަކަށް އެކަންޏެވެ. ބީލަމުގައި ރަޖިސްޓަރީ ވުމަށް، ބީލަން ފޮތް ގަތުމަށް އެދޭ ފޯމު ފުރިހަމަކޮށް ކައުންސިލް އިދާރާއަށް ހުށަހަޅަންޖެހޭނެއެވެ. ބީލަން ފޮތުގެ އަގަކީ 200 ރުފިޔާއެވެ.
ބީލަން ފޮތް ގަތުމަށް އެދޭ ފޯމު ދޫކުރުމާއި ބައި ބަލައިގަތުން އޮންނާނީ 2024 އޮކްޓޯބަރ 3 އިން 13 އަށް، ބަންދު ނޫން ކޮންމެ ދުވަހެއްގެ ހެނދުނު 10:00 އިން މެންދުރު 12:00 އަށެވެ. އަދި ބީލަން ބަލައިގަތުމާއި ބީލަން ކެނޑުން އޮންނާނީ 2024 އޮކްޓޯބަރ 22 ވާ އަންގާރަ ދުވަހުގެ ހެނދުނު 11:00 ގައި ވާދޫ ކައުންސިލް އިދާރާގެ ޖަލްސާކުރާ މާލަމުގައެވެ.
