ހުޅުމާލެ ފޭސް 3 ގައި ރޭ ހިންގި އޮޕަރޭޝަނެއްގައި ބަނގުލަދޭޝްގެ ދެ ފިރިހެނުން ހައްޔަރުކޮށްފިކަމަށް ދިވެހި ފުލުހުންގެ ޚިދުމަތުން މަޢުލޫމާތު ދީފިއެވެ.
ފުލުހުންގެ ފަރާތުން ބުނީ، ގަވާއިދާ ޚިލާފަށް ބަނގުރާ ގެންގުޅެ، ބޭނުންކޮށް، އެތަކެތީގެ ވިޔަފާރިކުރާކަމަށް ކައުންޓަރ ނާކޮޓިކްސް އިންޓެލިޖެންސަށް ލިބުނު މަޢުލޫމާތަކާ ގުޅިގެން މި އޮޕަރޭޝަން ހިންގާފައިވާ ކަމަށެވެ. މި މައްސަލައާ ގުޅިގެން ހައްޔަރުކޮށްފައިވަނީ 49 އަހަރުގެ ޕަރަން ދާސް އާއި 30 އަހަރުގެ އަލް އަމީން ކަމަށް ފުލުހުން ހާމަކުރިއެވެ.
ފުލުހުން ބުނި ގޮތުގައި، މި އޮޕަރޭޝަން ހިންގާފައިވަނީ ހުޅުމާލެ ފޭސް 3 ގައި ކޮންސްޓްރަކްޝަން މަސައްކަތްކުރާ ސައިޓެއްގައެވެ. އެތަނުން މި ދެ މީހުން ހައްޔަރުކޮށް، ބަލައިފާސްކުރިއިރު 324 ދަޅު ބަނގުރާ، 378 ފުޅި ބަނގުރާ އަދި ބަނގުރާކަމަށް ބެލެވޭ އެއްޗެއްހުރި 5 ލީޓަރުގެ 10 ފުޅިއާއި 500 އެމްއެލްގެ ހަތް ފުޅި ފެނިފައިވާ ކަމަށް ފުލުހުން މަޢުލޫމާތު ދިނެވެ.
މި އޮޕަރޭޝަން ހިންގާފައިވަނީ ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން ކަމަށް ފުލުހުން ބުންޏެވެ. އަދި މި މައްސަލަ މިހާރު ގެންދަނީ ތަޙުޤީޤުކުރަމުން ކަމަށްވެސް ފުލުހުން ހާމަކުރިއެވެ.
