އިނގިރޭސި ޕްރިމިއާ ލީގުގައި ކްރިސްޓަލް ޕެލޭސް އަތުން 1-0 އިން މޮޅުވެ, ލިވަޕޫލުން ތާވަލުގެ އެއްވަނަ ދިފާއުކޮށްފިއެވެ.
ޕެލޭސްގެ ދަނޑު ކަމުގައިވާ ސެލްހާސްޓް ޕާކުގައި ކުޅުނު މެޗު ކޮންޓްރޯލްކޮށްގެން ރަނގަޅަށް ކުޅުނީ ލިވަޕޫލެވެ. އެ ގޮތުން މެޗު ފެށިގެން 9 ވަނަ މިނެޓުގައި އެ ޓީމުން ވަނީ ލަނޑު ޖަހާ މެޗުގެ ލީޑު ނަގާފައެވެ. މި ލަނޑަކީ ކޯޑީ ގަކްޕޯ ފަހިކޮށްދިން ފުރުސަތަކުން ޑިއޯގޯ ޖޯޓާ ކާމިޔާބު ކުރި ލަނޑެކެވެ.
މެޗުގެ ދެވަނަ ހާފުގައި ޕެލޭސްއިން ވަނީ އެ ޓީމުގެ ކުޅުން ރަނގަޅުކޮށް ލިވަޕޫލުގެ ގޯލާ އަމާޒުކޮށް ރަނގަޅު ހަމަލާތަކެއް ފޮނުވާލާފައެވެ. ނަމަވެސް ލިވަޕޫލުގެ ހުނަރުވެރި ގޯލްކީޕަރު އެލިސަން ބެކާ ވަނީ މި ހަމަލާތައް މަތަކޮށް ލިވަޕޫލުގެ ލީޑު ދަމަހައްޓައިދީފައެވެ.
މިއަދުގެ މެޗުގައި ލިވަޕޫލަށް ކުރިމަތިވި ހަމައެކަނި ގޮންޖެހުމަކީ މެޗުގައި ތަފާތު ކުޅުމެއް ދައްކަމުން އައި އެ ޓީމުގެ ކީޕަރު އެލިސަން އިންޖަރީވުމެވެ. މެޗުގެ ދެވަނަ ހާފުގައި އެލިސަންގެ ފައިފަލަމަސްގަނޑަށް ދިމާވި އަނިޔާއެއްގެ ސަބަބުން އޭނާ ވަނީ ދަނޑުން ބާލުވަން ޖެހިފައެވެ. ލިވަޕޫލުން މެޗުގެ ނުވަދިހަ މިނެޓު ހަމަކުރީ އެ ޓީމުގެ ތިންވަނަ ކީޕަރު ޖާރޯސް އަރުވައިގެންނެވެ.
މި މެޗުން ލިބުނު ތިން ޕޮއިންޓާއެކު ލިވަޕޫލުން ވަނީ އެ ތާވަލުގެ އެއްވަނަ ދިފާއުކޮށްފައެވެ. ލިވަޕޫލުން ތާވަލުގެ އެއްވަނައިގައި އޮތީ ކުޅުނު 7 މެޗުން ލިބުނު 18 ޕޮއިންޓާއެކުގައެވެ. ދެވަނައިގައި އޮތް މެންޗެސްޓާ ސިޓީއަށާއި ތިންވަނައިގައި އޮތް އާސެނަލްއަށް ލިބިފައިވަނީ 17 ޕޮއިންޓެވެ.
