ހއ. އުތީމު ބަނދަރު ސަރަހައްދުން ތެޔޮ ވިއްކުމަށް 25 އަހަރުދުވަހުގެ މުއްދަތަށް ބިމެއް ކުއްޔަށް ދިނުމަށް އުތީމު ކައުންސިލުން އަލުން ފުރުޞަތު ހުޅުވާލައިފިއެވެ.
ކައުންސިލުން އަލުން މިފުރުސަތު ހުޅުވާލީ، ކުރިން 19 ސެޕްޓެންބަރު 2024 ގައި ކޮށްފައިވާ އިޢުލާނާ ގުޅިގެން އެއްވެސް ފަރާތަކުން ޕްރޮޕޯސަލް ހުށަހަޅުއްވާފައި ނުވާތީއެވެ. ކައުންސިލުން ހާމަކުރާގޮތުގައި، ކުއްޔަށް ދޫކުރެވޭ ބިން އޮތީ ހއ. އުތީމު ބަނދަރުގެ ހުޅަނގު ފަރާތުގައެވެ. ބިމުގެ ބޮޑުމިނަކީ 2,324 އަކަފޫޓެވެ. ދޫކުރެވޭ އެންމެ ކުޑަ ކުއްޔަކީ އަކަފޫޓަކަށް މަހަކު 0.75 ލާރިއެވެ. މިއީ ފުރަތަމަ 5 އަހަރަށް ކަނޑައަޅާފައިވާ ކުއްޔެވެ.
އުތީމު ކައުންސިލްގެ އިދާރާއިން މަޢުލޫމާތު ދެއްވިގޮތުގައި، ބިން ކުއްޔަށް ހިފުމަށް ޝައުޤުވެރިވެލައްވާ ފަރާތްތަކުން 13 އޮކްޓޫބަރު 2024 ވާ އާދިއްތަ ދުވަހުގެ 13:00 ގެ ކުރިން ކައުންސިލަށް ވަޑައިގެން ބިމަށް އެދޭ ފޯމް ހުށަހެޅުއްވުމަށް އެދިވަޑައިގެންފައިވެއެވެ. ބިމަށް އެދޭ ފޯމެއްގެ އަގަކީ 100 ރުފިޔާއެވެ. މި ފޯމް ލިބެން ހުންނާނީ ކައުންސިލްގެ އިދާރާއިންނެވެ.
މިކަމަށް އެދި ހުށަހަޅާ ޕްރޮޕޯސަލްތައް ބަލައިގަތުން އޮންނާނީ 21 އޮކްޓޫބަރު 2024 ވާ ހޯމަ ދުވަހުގެ މެންދުރުފަހު 13:00 ގައެވެ. މި ބީލަން ހުޅުވާލެވިފައިވަނީ، ވިޔަފާރި ރަޖިސްޓަރީކުރުމުގެ ޤާނޫނާއި އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ވިޔަފާރި ރަޖިސްޓަރީ ކުރެވިފައިވާ ފަރާތްތަކަށެވެ.
އިތުރު މަޢުލޫމާތު ސާފުކުރުމަށް ބޭނުންފުޅުވާ ފަރާތްތަކަށް ކޮންމެ ރަސްމީ ދުވަހެއްގެ ހެނދުނު 8:00 އިން 14:00 އަށް ކައުންސިލްގެ ނަންބަރު 6500038 އަށް ގުޅުއްވައިގެން އެކަމެއް ސާފުކުރެއްވުމަށް ކައުންސިލުން އެދިވަޑައިގެންފައިވެއެވެ.
