ރާއްޖޭގެ ރައީސުލް ޖުމްހޫރިއްޔާ ޑޮކްޓަރ މުހައްމަދު މުއިއްޒާއި އަނބިކަނބަލުން ސާޖިދާ މުހައްމަދު މިހާރު އިންޑިޔާއަށް ކުރައްވަމުން ގެންދަވާ ރަސްމީ ދަތުރުފުޅުގައި އިންޑިޔާގެ ރިޔާސީ ގަނޑުވަރުން، ބޮޑުވަޒީރު ނަރެންދުރަ މޯދީ އާއި ރައީސް ދުރޫޕަދީ މުރުމޫ، ރައީސްގެ ދެކަނބަލުންނަށް ވަރަށް ހޫނު މަރުޚަބާއެއް މިއަދު ހެނދުނު ދަންނަވައިފިއެވެ.
އިންޑިއާގެ ރިޔާސީ ގަނޑުވަރު ރާސްތުރަޕަތީބަވަންގެ ގޯތި ތެރޭގައި ކުރިއަށްދިޔަ މި ރަސްމިއްޔާތުގައި ރައީސުލްޖުމްހޫރިއްޔާގެ ދެކަނބަލުންގެ ޝަރަފުގައި ޚާއްސަ ގާޑް އޮފް އޮނަރއެއް އެރުވިއެވެ. އަދި އިންޑިއާގެ އަސްކަރިއްޔާގެ ޚާއްސަ ހަރަކާތްތަކަކާއި، ސަޤާފީ ބައެއް ހަރަކާތްތައް ކުރިއަށް ގެންދިޔައެވެ.
ރައީސުލްޖުމްހޫރިއްޔާގެ ދެކަނބަލުން އިންޑިއާއަށް ކުރައްވާ މި ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުުގައި ރައީސް ޑޮކްޓަރ މުއިއްޒު، އިންޑިޔާގެ ބޮޑުވަޒީރު މޯދީ އާއި ރައީސް ދުރޫޕަދީއާ ބައްދަލު ކުރެއްވުމަށް ވަނީ ހަމަޖެހިފައެވެ.
ރައީސްގެ މި ދަތުރުފަށް ދުނިޔޭގެ ބޮޑެތި މީޑިޔާތައް ކަމަށްވާ އަލްޖަޒީރާ އާއި ބީބީސީގެ ސަމާލުކަން ލިބިފައިވާކަންވެސް ފާހަގަ ކޮށްލެވެއެވެ.
