ދ. ބަނޑިދޫގައި އަންހެނުންނަށް ޙާއްސަ ކަރަންޓާއި ގުޅޭ ވޯކްޝޮޕެއް ބާއްވައިފިއެވެ.
މި ވޯކްޝޮޕް ބޭއްވީ މޯލްޑިވްސް އެންހޭންސިންގ އެމްޕްލޮޔަބިލިޓީ އެންޑް ރެޒިލިއަންސް އޮފް ޔޫތް ޕްރޮޖެކްޓް (މީރީ) އާއި ދ. ބަނޑިދޫ ކައުންސިލް ގުޅިގެންނެވެ. މި އަހަރުގެ އޮކްޓޯބަރު މަހުގެ 5 އިން 7 އަށް ބޭއްވުނު މި ވޯކްޝޮޕަކީ ކަރަންޓާ ބެހޭ އަސާސީ މަޢުލޫމާތުގެ އިތުރުން އަމަލީ ގޮތުން ވެސް ތަމްރީނު ވުމަށް ހުޅުވާލެވުނު ފުރުސަތެކެވެ. މި ވޯކްޝޮޕްގައި މަސައްކަތުގެ މައިދާނުގައި އަދި އަމިއްލަ ދިރިއުޅުމުގައި ވެސް ކަރަންޓު ބޭނުންކުރާއިރު ސަމާލުކަން ދޭންޖެހޭ މުހިންމު ކަންކަމާއި، ކަރަންޓާ ގުޅޭ އެކިއެކި މައްސަލަތައް ހައްލުކުރުމާ ގުޅޭ މަޢުލޫމާތު ހިއްސާކޮށްފައިވެއެވެ.
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގެ ދަށުން މަސައްކަތްކުރާ މީރީ ޕްރޮޖެކްޓުން އަންނަނީ ޒުވާނުންނާއި އަންހެނުންނަށް ޚާއްސަ އެތައް ތަމްރީނު ޕްރޮގްރާމްތަކަކާއި ވޯކްޝޮޕްތަކެއް ހިންގަމުންނެވެ. މިފަދަ ހަރަކާތްތަކުގައި އަންހެނުންނާއި އަންހެން ކުދިން ބައިވެރިވާ އަދަދު އިތުރުކުރުމަށްޓަކައި މީރީއިން ދަނީ ޕްރޮޖެކްޓް ފޮރ ޖެންޑަރ އެކްޝަން ޕްލޭންގެ ދަށުން، އެކި ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިތުރުން ތަފާތު ފާތު ޖަމްޢިއްޔާ ޖަމާޢަތްތަކާ ގުޅިގެން މަސައްކަތްކުރަމުންނެވެ.
މި ވޯކްޝޮޕަކީ އަންހެނުން ވަޒީފާގެ މައިދާނަށް ނުކުތުމަށް ހިތްވަރު ދިނުމަށާއި، އަންހެނުންގެ ހުނަރުވެރިކަން އިތުރުކުރުމަށް އަމާޒުކޮށްގެން ބޭއްވުނު މުހިންމު ހަރަކާތެއްކަން ފާހަގަކުރެވެއެވެ. މިފަދަ ވޯކްޝޮޕްތަކުން އަންހެނުންނަށް ލިބޭ ތަޖުރިބާއާއި މަޢުލޫމާތަކީ އެ ފަރާތްތަކުގެ ދިރިއުޅުމަށް ފށް ފައިދާހުރި، އަދި އިޤްތިޞްތިޞާދީ ގޮތުން ބާރުވެރިކުރުވާނެ ކަމެއްކަން ޝައްކެއް ނެތެވެ.
