ދިވެހިރާއްޖޭގެ ތާރީހާއި ރާއްޖެއާއި ގުޅޭ މައުލޫމާތު ރައްކާކުރުމަށް ގާއިމްކުރާ ޑިޖިޓަލް އާކައިވް ޕްރޮޖެކްޓާއެކު މައުލޫމާތު ރައްކާކުރާ ގޮތްތަކަށް ބޮޑެތި ހެޔޮ ބަދަލުތަކެއް އާންނާނެ ކަމަށް ޒުވާނުން ބާރުވެރިކުރުވުމާއި މައުލޫމަތާއި ފަންނާ ބެހޭ ވަޒީރު އިބްރާހިމް ވަހީދު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ، ޑިޖިޓަލް އާކައިވް ޕްރޮޖެކްޓްގެ ޕްރޮޓޯޓައިޕް އިފްތިތާހުކުރުމަށް ބޭއްވި ރަސްމިއްޔާތުގައެވެ.
މި ރަސްމިއްޔާތުގައި ވާހަކަދައްކަވަމުން ވަޒީރު އިބްރާޙިމް ވަހީދު ވިދާޅުވީ، މިނިޒާމަކީ ހަމައެކަނި ރާއްޖޭގެ ތާރީހު ބުނެދޭނެ ވެބްސައިޓެއް ނޫންކަމަށާއި، މިއީ ދުނިޔެއަށް ދިވެހިރާއްޖެ ބުނެދޭނެ މަސައްކަތަކަށް ވެގެންދާނެ ކަމަށެވެ.
މިއީ ދިވެހިރާއްޖޭގެ ދެމެހެއްޓެނިވި ތަރައްގީއަށްވެސް މުހިންމު މަސައްކަތެއް ކަމަށް މިނިސްޓަރ ފާހަގަކުރެއްވިއެވެ.
"ރާއްޖޭގެ ސަގާފަތް، ދިވެހިންގެ ދިރިއުޅުމުގެ ވައްޓަފާޅިއާއި ތާރީޚީ ވާހަކަތަކާއި، ޖުމްލަކޮށް ރާއްޖެއަށް މުހިންމު ހުރިހާ ދާއިރާއިން ތާރީޚައްޓަކާއި މައުލޫމާތު ހިމަނާނެ. ތާރީހީ ތަންތަނާއި ތަކެތި ނެތިދާ ހާލަތުގައިވެސް މި މައުލޫމާތު ރައްކާތެރިކަމާއެކު ބެލެހެއްޓެމުން ދާނެ." މިނިސްޓަރ ވިދާޅުވިއެވެ.
މި ޑިޖިޓަލައިޒް ނިޒާމަކީ ދިވެހިރާއްޖޭގެ ތާރީހާއި ސަގާފަތާ، ރާއްޖޭގައި ހިންގަމުންދާ މުހިންމު މަސައްކަތްތަކުގެ މައުލޫމާތު އިންޓަނެޓްގައި ރައްކާތެރިކޮށް އަންނަން އޮތް ޖީލުތަކަށް ފޯރުކޮށްދިނުމަށް، ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ ވައުދުފުޅާ އެއްގޮތަށް ފައްޓަވާފައިވާ މަސައްކަތެކެވެ.
"ޑިޖިޓަލް އާކައިވް ޕްރޮޖެކްޓްގެ ޕްރޮޓޯޓައިޕް" އިފްތިތާޙުކޮށްދެއްވީ ޒުވާނުން ބާރުވެރިކުރުވުމާއި، މައުލޫމާތާއި ފަންނާބެހޭ ވަޒީރު އިބްރާޙިމް ވަޙީދު އަދި ޑިރެކްޓަރ ޖެނެރަލް އޮފް ދަ ނެޝަނަލް އަރކައިވްސް އޮފް މޯލްޑިވްސް މުހައްމަދު އާމިރު އަހްމަދުއެވެ.
އޯއޭއައިއެސް ކްލައުޑް އާއި ޖިއާރެޓާ އެސޯސިއޭޓްސް އަދި ދިވެހިރާއްޖޭގެ ގައުމީ އަރުޝީފްގެ މި ޕާޓްނަޝިޕްގެ ސަބަބުން ނަމްސްގެ ޑިޖިޓަލް ރެކޯޑްތައް ރައްކާތެރިކުރުމުގެ ގާބިލްކަން އިތުރުވެގެން ދިއުމާއި އެކު ކުދި ޖަޒީރާ ތަރައްގީވަމުން އަންނަ ދައުލަތްތަކަށް ޑިޖިޓަލް ރައްކާތެރިކުރުމުގެ ފުޅާ ޢިލްމާއި ތަޖުރިބާ ލިބިގެންދާނެއެވެ.
މަޢުލޫމާތު:https://sarukaaru.gov.mv/articles/4786
