މާލެ (އެމްޕީއެލް) - ދުނިޔޭގެ އެންމެ ބޮޑު ޝިޕިންލައިން ކަމަށްވާ މެޑިޓެރޭނިއަން ޝިޕިން ކޮމްޕެނީ (އެމް.އެސް.ސީ)ގެ ދަތުރުތައް ދިވެހިރާއްޖެއަށް ފަށައިފިއެވެ.
އެމް.އެސް.ސީން ރާއްޖެއަށް އައި ފުރަތަމަ ބޯޓު ކަމަށްވާ "އެމް.އެސް.ސީ މަނާސާ އެފް" އިއްޔެ މާލޭގައި ބަނދަރުކުރުމާއެކު، މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ވޯޓަރ ސެލިއުޓްއެއް ދީގެން މަރުހަބާ ކިޔައިފިއެވެ. މި ބޯޓުގައި ރާއްޖެއަށް 800 ކޮންޓެއިނަރ ގެނެސްފައިވާކަން ފާހަގަކޮށްލެވެއެވެ. މި ކޮންޓެއިނަރުތަކުގައި ހިމެނެނީ މުޅިންވެސް ޖެނެރަލް ކާގޯއެވެ.
މި ތާރީޚީ ވަގުތު ފާހަގަކުރުމަށްޓަކައި އެމްޕީއެލް އާއި އެމް.އެސް.ސީގެ ލޯކަލް އޭޖެންޓް، ސެންޗޫރިއަންއާ ގުޅިގެން މިއަދު ހެނދުނު މާލޭ ވިޔަފާރި ބަނދަރުގައި ޚާއްޞަ ރަސްމިއްޔާތެއް ބޭއްވިއެވެ. މި ރަސްމިއްޔާތުގައި ބޯޓުގެ ކެޕްޓަނަށް އެމްޕީއެލް އަދި ސެންޗޫރިއަންގެ ފަރާތުން ހަނދާނީ ފިލާ އެރުވިއެވެ.
ރަސްމިއްޔާތުގައި ވާހަކަފުޅު ދައްކަވަމުން އެމްޕީއެލްގެ ސީއީއޯ މުޙައްމަދު ވަޖީހް އިބްރާހިމް ވިދާޅުވީ، އެމް.އެސް.ސީގެ ދަތުރުތައް ރާއްޖެއަށް ފެށުމަށް ސެންޗޫރިއަންއިން ކުރި މަސައްކަތަށް ޝުކުރު އަދާކުރާ ކަމަށެވެ. އަދި މާލޭ ވިޔަފާރި ބަނދަރުގެ ޚިދުމަތްތައް ހަރުދަނާކުރުމަށް މިހާރުވެސް ގިނަ މަސައްކަތްތަކެއް ކުރަމުން އަންނަ ކަމަށެވެ.
މީގެއިތުރުން، ސެންޗޫރިއަންގެ މެނޭޖިން ޑިރެކްޓަރ އައިމަން ޖަލީލް ވިދާޅުވީ، އެމް.އެސް.ސީގެ ދަތުރުތައް ރާއްޖެއަށް ފެށުމުގައި އެންމެ ބޮޑު އެހީތެރިކަމެއް ލިބުނީ އެމްޕީއެލްގެ ފަރާތުން ކަމަށެވެ. އަދި މިއީ ވިޔަފާރީގެ ދާއިރާއަށް ލިބުނު ވަރަށް ބޮޑު ކުރިއެރުމެއް ކަމަށް ވެސް އެބޭފުޅާ ވިދާޅުވިއެވެ.
މި ތާރީޚީ ދަތުރާއެކު، ދުނިޔޭގެ އެންމެ ބޮޑު ޝިޕިންލައިންގެ ޚިދުމަތް ރާއްޖެއަށް ލިބެން ފެށުމަކީ، ރާއްޖޭގެ ވިޔަފާރި އަދި އިޤްތިޞާދަށް ލިބޭނެ ބޮޑު ކުރިއެރުމެއްކަމަށް ބެލެވެއެވެ.
