އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު، އައިލެންޑް ބެވެރަޖްސް މޯލްޑިވްސްގެ މެނޭޖިންގ ޑިރެކްޓަރ މުޙައްމަދު ޖިނާން ޖަލީލާއި މިއަދު ބައްދަލުކުރައްވައިފިއެވެ.
މި ބައްދަލުވުން ބޭއްވުނީ އިސްލާމީ ކަންތައްތަކާ ބެހޭ ވުޒާރާގައެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވުނީ މާލެ ސިޓީގެ މިސްކިތްތަކުން ބޯފެން ލިބޭނެ އިންތިޒާމް ހަމަޖެއްސުމާ ގުޅޭ ގޮތުންނެވެ. މީގެ އިތުރުން، ވުޒާރާއާއި އައިލެންޑް ބެވެރަޖްސް މޯލްޑިވްސްއާ ގުޅިގެން ކުރިއަށް އޮތްތަނުގައި ކުރެވިދާނެ އެހެނިހެން މަސައްކަތްތަކާ ބެހޭ ގޮތުންވެސް ވަނީ މަޝްވަރާކުރެވިފައެވެ.
މި މުހިންމު ބައްދަލުވުމުގައި އިސްލާމީ ކަންތައްތަކާ ބެހޭ ވުޒާރާގެ އިސްވެރިންނާއި އައިލެންޑް ބެވެރަޖްސް މޯލްޑިވްސްގެ އިސްވެރިން ބައިވެރިވެ ވަޑައިގެންނެވިއެވެ.
