ނ. ވެލިދޫގައި ގާއިމްކުރަމުންދާ ޖޫނިއަރ ކޮލެޖްގެ 30 ޕަސެންޓް މަސައްކަތް ނިމިފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން މިއަދު ހާމަކޮށްފިއެވެ.
މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމެންޓްގެ ފަރާތުން، މަތީ ތަޢުލީމު ކުރިއެރުވުމަށް އަމާޒުކޮށް، ނ. ވެލިދޫގައި ޖޫނިއަރ ކޮލެޖެއް ބިނާކުރުމުގެ މަސައްކަތް މިހާރު ވަނީ ފަށާފައެވެ. މި މަޝްރޫޢުގެ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް ކޮންޓްރެކްޓިންގ ކޮންޕެނީ ޕލކ (އެމްޓީސީސީ) އާއެވެ.
މި ކޮލެޖް އިމާރާތްކުރުމުގެ މަސައްކަތް ނިމިގެންދާއިރު، ސްމާޓް ކްލާސް ރޫމްތަކުގެ އިތުރުން އައިސީޓީ ލެބޯޓްރީތަށް ބިނާކުރުމަށް ވެސް ހަމަޖެހިފައިވާކަމަށް ވުޒާރާއިން މަޢުލޫމާތު ދެއެވެ. އަދި މި މަސައްކަތް ނިމި ކިޔަވައިދޭން ފެށޭނެކަމަށް ލަފާކުރަނީ 2025 ވަނަ އަހަރުކަމަށްވެސް ވުޒާރާއިން ބުނެއެވެ.
ދިވެހި ޒުވާނުންގެ ހުނަރުވެރިކަން އިތުރުކުރުމަށް ތަފާތު ތަމްރީނު ޕްރޮގްރާމްތަށް ފޯރުކޮއްދިނުމާއި އެކި ރަށްރަށަށް މަތީ ތަޢުލީމުގެ ފުރުޞަތު ފަހިކޮއްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އަހަމިއްޔަތެއް ދެއްވާކަމެއްކަން ވުޒާރާއިން ފާހަގަކުރެއެވެ. އެގޮތުން، ނ.ވެލިދޫގައި ގާޢިމްކުރުމަށް ހަމަޖެހިފައިވާ މި ޖޫނިއަރ ކޮލެޖަކީ ދިވެހި ދަޢުލަތުން މަތީ ތަޢުލީމު ކުރިއެރުވުމަށް އަމާޒުކޮށް ކުރިއަށް ގެންދާ ވަރަށް މުޙިއްމު ޕްރޮޖެކްޓެއްކަމަށް ވުޒާރާއިން ބުނެއެވެ.
