މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން 44 ވަނަ މަސްވެރިންގެ ދުވަހުގެ މުނާސަބަތުގައި ދޭ ތިން އެވޯޑަކަށް ކުރިމަތިލުމުގެ ފުރުޞަތު ހުޅުވާލައިފިއެވެ.
މި އެވޯޑުތަކަކީ ޒުވާން ކެޔޮޅުންގެ އެވޯޑާއި، ތަޖުރިބާކާރު ކެޔޮޅުންގެ އެވޯޑު އަދި ޚިދުމަތްތެރި ފަރުމަސްވެރިޔާގެ އެވޯޑެވެ. ޒުވާން ކެޔޮޅުންގެ އެވޯޑަށް ކުރިމަތިލެވޭނީ 35 އަހަރުން ދަށުގެ، މިހާރުވެސް މަސްވެރިކަމުގައި ޢަމަލީގޮތުން އުޅޭ އަދި މަސްވެރިކަން ިކަން ފިޔަވައި އެހެން މަސައްކަތެއް ނުކުރާ ފަރާތްތަކަށެވެ. ތަޖުރިބާކާރު ކެޔޮޅުންގެ އެވޯޑަށް ކުރިމަތިލެވޭނީ 35 އަހަރުން މަތީގެ، ހަމަ މި ޝަރުތުތައް ފުރިހަމަވާ ފަރާތްތަކަށެވެ. އަދި ޚިދުމަތްތެރި ފަރުމަސްވެރިޔާގެ އެވޯޑަށް ކުރިމަތިލެވޭނީ އާމްދަނީ ހޯދުމަށް ކުރާ މައިގަނޑު މަސައްކަތަކީ ފަރުމަހުގެ މަސްވެރިކަން ކަމުގައިވާ ފަރާތްތަކަށެވެ.
މި އެވޯޑުތަކަށް ކުރިމަތިލާން ބޭނުންވާ ފަރާތްތަކުން 2024 ނޮވެމްބަރު 7 ވާ ބުރާސްފަތި ދުވަހުގެ 14:00 ގެ ކުރިން މިނިސްޓްރީއަށް ފޯމު ހުށަހަޅަންވާނެއެވެ. ފޯމު މިނިސްޓްރީގެ ވެބްސައިޓުން ޑައުންލޯޑު ކުރެވެން ހުންނާނެ ކަމަށް މިނިސްޓްރީން މަޢުލޫމާތު ދީފައިވެއެވެ.
މިނިސްޓްރީން އިތުރަށް ބުނެފައިވަނީ މި އެވޯޑުތަކަށް އެދި އަމިއްލަ ހައިސިއްޔަތުން ނުވަތަ އެހެން ފަރާތަކުން ވެސް ނަން ހުށަހެޅުމުގެ ފުރުޞަތު އޮތް ކަމަށެވެ. އަދި ފުރިހަމަކޮށްފައިވާ ފޯމު މިނިސްޓްރީގެ އީމެއިލް އެޑްރެހަށް ފޮނުވުމަށް ވެސް އެދިފައިވެއެވެ.
މި އެވޯޑުތަކަކީ މަސްވެރިކަމުގެ ދާއިރާގައި އުޅޭ ފަރާތްތަކުގެ ހުނަރާއި ޚިދުމަތް ފާހަގަކޮށް، އެފަރާތްތަކަށް ހިތްވަރު ދިނުމަށް ކޮންމެ އަހަރަކު ދެމުން އަންނަ އެވޯޑުތަކެކެވެ.
