ފަރެސްމާތޮޑާ ދާއިރާގެ މެންބަރު އަޝްރަފު ރަޝީދާއި ގދ. ފިޔޯރީ ކައުންސިލްގެ މެންބަރުން، މިއަދު މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާގެ ވަޒީރު ޠާރިޤް އިބްރާހީމްއާ ބައްދަލުކުރައްވައިފިއެވެ.
މި ބައްދަލުވުން ބޭއްވުނީ މިނިސްޓްރީގައައި ކަމަށާއި، މިނިސްޓްރީގެ އިސް އޮފިޝަލުންވެސް މި ބައްދަލުވުމުުގައި ބައިވެރިވެ ވަޑައިގެންނެވިއެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ފިޔޯރީ ރައްޔިތުންގެ ކަންބޮޑުވުންތަކުގެ ތެރޭގައި ހިމެނޭ ހިންމު މައްސަލަތަކެވެ. މިގޮތުން، ފިޔޯރީގެ ގޮނޑުދޮށް ގިރުމުގެ މައްސަލަ، ކުނި މެނޭޖްކުރުން އަދި ޙިމާޔަތްކޮށްފައިވާ ސަރަޙައްދުތަކާ ގުޅޭ ކަންކަމާ ބެހޭގޮތުންނެވެ.
ބައްދަލުވުމުގައި ފިޔޯރީގެ ގޮނޑުދޮށް ގިރުމުގެ މައްސަލައަށް ދާއިމީ ޙައްލެއް ހޯދުމާއި، ރަށުގެ ކުނި މެނޭޖްކުރުމުގެ ނިޒާމު ހަރުދަނާކުރުމާއި، ޙިމާޔަތްކޮށްފައިވާ ސަރަޙައްދުތައް ބެލެހެއްޓުމުގެ މަސައްކަތްތައް އިތުރަށް ހަރުދަނާކުރުމާ ގުޅޭގޮތުން ތަފްޞީލީ މަޝްވަރާތަކެއް ކުރެވުނެވެ.
މިނިސްޓަރ ޠާރިޤް އިބްރާހީމް ވިދާޅުވީ މި މައްސަލަތަކަށް އަވަސް ޙައްލެއް ހޯދުމަށް މިނިސްޓްރީން މަސައްކަތްކުރާނެ ކަމަށެވެ. އަދި ކައުންސިލާ ގުޅިގެން މި ކަންކަން ޙައްލުކުރލުކުރުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށްވެސް އެ މަނިކުފާނު ވިދާޅުވިއެވެ. ފަރެސްމާތޮޑާ ދާއިރާގެ މެންބަރު އަޝްރަފު ރަޝީދު ވިދާޅުވީ މި މައްސަލަތަކަކީ ފިޔޯރީ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށާއި، މިކަމަށް އަވަސް ޙައްލެއް ހޯދުމަކީ ވަރަށް މުހިންމު ކަމެއް ކަމުގައެވެ. އަދި މިނިސްޓްރީގެ އެހީތެރިކަމާއެކު މި މައްސަލަތަކަށް އަވަސް ޙައްލެއް ލިބޭނެކަމުގެ އުންމީދު އޮތް ކަމަށްވެސް އެ މަނިކުފާނު ވިދާޅުވިއެވެ.
މި ބައްދަލުވުމަކީ ފިޔޯރީގެ ތިމާވެށްޓާ ގުޅުންހުރި މުހިންމު މައްސަލަތަކަށް ޙައްލު ހޯދުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ. މިނިސްޓްރީން މި މައްސަލަތަކަށް ޙައްލު ހޯދުމަށް އަޅާނެ ފިޔަވަޅުތަކާ ބެހޭ އިތުރު މަޢުލޫމާތު ކުރިއަށް އޮތް ދުވަސްތަކުގައި ހާމަކުރާނެ ކަމަށް ބެލެވެއެވެ.
