އިސްލާމީ ކަންތަކާ ބެހޭ ވުޒާރާއިން މާލޭގައި އިމާރާތްކުރާ ވަގުފު ބިލްޑިންގްގެ ކުރެހުން ތައްޔާރުކޮށްދޭނެ ފަރާތެއް ހޯދުމަށް އިޢުލާންކޮށްފިއެވެ.
މި އިމާރާތަކީ މާލޭގެ 64 ނަންބަރު ކޮށީގައި އެޅުމަށް ހަމަޖެހިފައިވާ ދާރުލް އަރުޤަމް ވަޤުފް އިމާރާތެވެ. ވުޒާރާއިން މަޢުލޫމާތު ދެއްވި ގޮތުގައި މި އިޢުލާނުގެ ދަށުން ހޯދަނީ އިމާރާތުގެ ކޮންސެޕްޓް ޑިޒައިން، ކުރެހުންތައް، ބީއޯކިޔު، ޓެކްނިކަލް އަދި މެޓީރިއަލް ސްޕެސިފިކޭޝަންތަކާއި، ޓެންޑަރ ޑޮކިއުމެންޓް ތައްޔާރުކޮށްދޭނެ ފަރާތެކެވެ.
މި ބީލަން ހުޅުވާލެވިފައިވަނީ ވިޔަފާރި ރަޖިސްޓްރީ ކުރުމުގެ ޤާނޫނުގެ ދަށުން ރަޖިސްޓްރީ ކޮށްފައިވާ ކުދި އަދި މެދު ފަންތީގެ ވިޔަފާރިތަކަށެވެ. ބީލަމުގައި ބައިވެރިވާން ޝައުޤުވެރިވާ ފަރާތްތަކުން މި މުން މި މަހުގެ 14 ވަނަ ދުވަހުގެ މެންދުރުފަހު 2:00 ގެ ކުރިން ރަޖިސްޓްރީވުމަށް ވުޒާރާއިން އަންގަވާފައިވެއެވެ.
މީގެ އިތުރުން، ހުޅުމާލޭގައި ދާރުއްސަލާމްގެ ނަމުގައި އިތުރު ވަޤުފް އިމާރާތެއް ބިނާކުރުމަށްވެސް ނިންމާފައިވާ ކަމަށް ވުޒާރާއިން ހާމަކުރެއްވިއެވެ. އެ އިމާރާތުގެ މަސައްކަތްކޮށްދޭނެ ފަރާތެއް ހޯދުމަށްވެސް ވަނީ އިޢުލާންކޮށްފައެވެ.
އިސްލާމީ ކަންތަކާ ބެހޭ ވުޒާރާއިން ވިދާޅުވީ މި ދެ މަޝްރޫޢުއަކީ މި ދައުރުގެ ތެރޭގައި ކުރިއަށް ގެންދިއުމަށް ހަމަޖެހިފައިވާ އެންމެ ބޮޑެތި މަޝްރޫޢުތައް ކަމަށެވެ. މި މަޝްރޫޢުތަކުގެ ސަބަބުން ރާއްޖޭގެ އިސްލާމީ ކަންތައްތަކަށް އިތުރު ކުރިއެރުމެއް ލިބިގެންދާނެ ކަމަށް އުއްމީދުކުރެވޭ ކަމަށްވެސް ވުޒާރާއިން ފާހަގަކުރެއްވިއެވެ.
