ފައިފަލަމަސްގަނޑުގެ އިންޖަރީއަކާ ގުޅިގެން ލިވަޕޫލުގެ ހުނަރުވެރި ގޯލްކީޕަރު އެލިސަން ބެކާ ހަ ހަފްތާއަށް ކުޅުމާ ދުރަށް ދާން ޖެހިއްޖެއެވެ.
އެލިސަން އިންޖަރީވެފައިވަނީ މި ދިޔަ ހޮނިހިރު ދުވަހު ލިވަޕޫލު 1-0 އިން ކްރިސްޓަލް ޕެލޭސް އަތުން ކުރި ހޯދި މެޗުގައެވެ. އެ މެޗުގައި އޭނާގެ ފައިފަލަމަސްގަނޑަށް ލިބުނު އަނިޔާގެ ސަބަބުން އިތުރަށް ނުކުޅެވުމުން އޭނާ ވަނީ މެޗުގެ 80 ވަނަ މިނެޓުގައި އިތުރު ފަރުވާއަށް ދަނޑުން ފައިބާފައެވެ.
އެލިސަންގެ އިންޖަރީ ރަނގަޅަށް ބަލާ ދިރާސާ ކުރުމަށް ފަހު, އެ އިންޖަރީ ރަނގަޅުވާން ހަ ހަފްތާ ނަގާނެ ކަމަށް ޑަކުޓަރުން ވަނީ ނިންމާފައެވެ. އެހެންކަމުން އެލިސަންއަށް އެންމެ އަވަހަށް ވެސް ދެން އެނބުރި ކުޅުމުގެ ތެރެއަށް އާދެވޭނީ 24 ނޮވެންބަރުގައި ޕްރިމިއާ ލީގުގައި ލިވަޕޫލު ސައުތޭމްޕްޓަންއާ ދެކޮޅަށް ނިކުންނަ މެޗަށެވެ.
އެލިސަންގެ މި އިންޖަރީގެ ސަބަބުން ލިވަޕޫލުން ޖެހޭނީ ފޯމުގައި އޮތް ޗެލްސީ އާއި އާސެނަލްއާ ދެކޮޅަށް ނިކުންނަ އިރު, ޓީމުގެ ދެވަނަ ކީޕަރު ކީވީން ކެލެހާ ބޭނުން ކުރާށެވެ. ފަހަކަށްއައިސް އެލިސަންއަށް ދިމާވާ އިންޖަރީތައް ގިނަވެފައިވާ އިރު ކެލެހާ ވަނީ އޭނާގެ ބަދަލަށް އަރާ, ރަނގަޅު ކުޅުމެއް ދައްކާފައެވެ.
