ކާރިސީ ހިރާސް ކުޑަކުރުމާބެހޭ ބައިނަލްއަޤްވާމީ ދުވަހާ ގުޅިގެން ފެނަކަ ކޯޕަރޭޝަނުން ހިންގަން ރާވާފައިވާ ޙަރަކާތްތަކާއި، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާ ގުޅިގެން ކުރިއަށް ގެންދެވިދާނެ ކަންކަމާ ގުޅޭގޮތުން މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުމުގައި، އޮކްޓޯބަރު 13 ވަނަ ދުވަހު ފާހަގަކުރާ ކާރިސީ ހިރާސް ކުޑަކުރުމާބެހޭ ބައިނަލްއަޤްވާމީ ދުވަހާ ގުޅިގެން ފެނަކައިން ރާވާފައިވާ ޚާއްސަ ޙަރަކާތްތަކުގެ މަޢުލޫމާތު ހިއްސާކުރެވުނެވެ. މީގެ ތެރޭގައި، ފެނަކައިން ހިންގާ 157 ބްރާންޗްގައި ކުއްލި ހާލަތަށް އިޖާބަދިނުމުގެ އުސޫލު އެކުލަވާލުމާއި، ކޮންމެ ރަށެއްގައި ހަރަކާތްތެރިވާނެ ޚާއްސަ ޓީމެއް އެކުލަވާލުން ހިމެނެއެވެ.
އަދި މި ދުވަހާ ގުޅުވައިގެން ފުވައްމުލައް ސިޓީގައި، އެމްއެންޑީއެފްއާއި ފެނަކަ ގުޅިގެން، ސަރުކާރުގެ އެހެނިހެން މުއައްސަސާތަކާއި ފެނަކައިގެ މުވައްޒަފުންނަށް އަމާޒުކޮށްގެން ޚާއްސަ ޙަރަކާތްތަކެއް ހިންގުމަށް ވަނީ ހަމަޖެހިފައެވެ. މި ޙަރަކާތްތަކުގެ މަޤްޞަދަކީ ކާރިސާތަކާ ގުޅޭ ހޭލުންތެރިކަން އިތުރުކުރުމާއި، ކުއްލި ހާލަތްތަކުގައި އަމަލުކުރަންވީ ގޮތުގެ މަޢުލޫމާތު ފޯރުކޮށްދިނުމެވެ.
