45 އަހަރުން ދަށުގެ އަންހެން ކަނބަލުންނަށް މަހުރަމަކާ ނުލައި އުމްރާއަށް ނުދެވޭ ގޮތަށް އިސްލާމީ ކަންތައްތަކާ ބެހޭ ވުޒާރާއިން އާއްމުކުރި އުސޫލުގައި އޮތް މާއްދާ އުވާލުމަށް އެ ވުޒާރާގެ ވަޒީރު ޑރ. މުހައްމަދު ޝަހީމް އަލީ ސައީދު އަންގަވައިފިއެވެ.
މި މާއްދާއަކީ 2022 ވަނަ އަހަރު އާއްމުކޮށް އަމަލު ކުރަމުން އައި އުސޫލުގައި ވެސް ހިމެނިފައިވާ މާއްދާއެކެވެ. މި މާއްދާ އުވާލަން ނިންމާފައިވަނީ, ސައުދީ އަރަބިއާއިން ކުރިން އަމަލުކުރަމުން އައި އުސޫލު ބަދަލުކުރައްވާ, އަންހެނުންނަށް މަހުރަމަކާ ނުލައި އުމްރާ ކުރަން ދެވޭނެ ގޮތަށް ހަމަޖައްސާފައިވާތީއެވެ.
އިސްލާމީ ކަންތައްތަކާ ބެހޭ ވުޒާރާއިން އާއްމުކުރެއްވި އުމްރާއަށް ގެންދިއުމާއި ގުޅޭ އާ އުސޫލަކީ, އުމްރާއަށް މީހުން ގެންދިއުމުގައި ކަންކަން ހިނގާ ގޮތް ހަރުދަނާ ކޮށް, އުމްރާއަށް މީހުން ގެންދިއުމަށް އެދި ހުށައަޅާ ކުންފުނިތަކަށް ލުއި ފަސޭހަ ކޮށްދިނުމަށް އެކުލަވާލި އުސޫލެކެވެ. އެ ގޮތުން މީގެ ކުރިން އަހަރަކު ދެ ފަހަރު ޕްރޮޕޯސަލް ހުށައެޅުމަށް ހުޅުވާލާ ގޮތަށް އޮތް މާއްދާ ބަދަލުކުރައްވާ, އަހަރަކު ކޮންމެ ހިސާބެއްގައި ވެސް އެކަމަށް އެދި ޕްރޮޕޯސަލް ހުށައެޅޭ ގޮތަށް މިހާރު ވަނީ އުސޫލަށް ބަދަލު ގެނެސްފައެވެ.
އުމްރާއަށް މީހުން ގެންދިއުމަށް ހުއްދަ ހޯދާ ފަރާތްތަކުން އުސޫލާއި އެއްބަސްވުމާއި ހިލާފުވެއްޖެނަމަ ބޮޑެތި އަދަދުތަކުން ޖޫރިމަނާ ކުރެވޭ ގޮތަށް ވެސް އުސޫލަށް ވަނީ ބަދަލު ގެނެސްފައެވެ.
