ހއ. އުލިގަމު ބަނދަރު ތަރައްޤީކުރުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެ ދަށުން ކުރިއަށްގެންދިޔަ ބޭސިން ފުންކުރުމުގެ މަސައްކަތް މިހާރު ފުރިހަމަކުރެވިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ (އެމްޓީސީސީ) އިން ބުނެފިއެވެ.
އެމްޓީސީސީން މިހެން ބުނީ އެ ކުންފުނީގެ ސޯޝަލް މީޑިއާގައި ކޮށްފައިވާ ޕޯސްޓައްގައެވެ. އެމްޓީސީސީއިން އިތުރަށް ބުނެފައިވަނީ މަސައްކަތަށް ބޭނުންވާ އެއްގަމު ތޮށީގެ ބްލޮކްގެ ފުރަތަމަ ޝިޕްމެންޓް މިހާރު ޕްރޮޖެކްޓް ސައިޓަށް ގެންދެވިފައިވާކަމަށެވެ.
އުލިގަމު ބަނދަރު ތަރައްޤީކުރުމުގެ މަޝްރޫޢުގެ ދަށުން އެމްޓީސީސީއިން ކުރަންޖެހޭ މަސައްކަތްތަކުގެ ތެރޭގައި 10,400 މީޓަރުގެ މެއިންޓެނަންސް ޑްރެޖިންގ، 46,181 ކިއުބިކް މީޓަރުގެ އައު ބަނދަރު ބޭސިން ފެންކުރުން، 21,708 ކިއުބިކް މީޓަރުގެ ޗެނަލް ޑްރެޖިންގ، 238 މީޓަރުގެ ބްރޭކްވޯޓަރއެއް ހެދުމާއި، 180 މީޓަރުގެ ރިވެޓްމަންޓް ޖެހުމާއި، 300 މީޓަރުގެ ގްރޮއިނެއް ޖެހުމާއި، 238 މީޓަރުގެ ކީވޯލެއްގެ މަސައްކަތް ހިމެނެއެވެ.
މި މަޝްރޫޢުއަކީ 74 މިލިއަން ރުފިޔާގެ މަޝްރޫޢުއެކެވެ.
