ކުޅުދުއްފުށީ ސިޓީގައި ޝަހީދު ޙުސައިން އާދަމްގެ ހަނދާނީ ބިނާ ހަދައިދޭނެ ފަރާތެއް ހޯދުމަށް ކުޅުދުއްފުށި ސިޓީ ކައުންސިލުން އިޢުލާނުކޮށްފިއެވެ.
މި މަސައްކަތަށް ޝައުޤުވެރިވާ ފަރާތްތަކުން މަޢުލޫމާތު ސާފުކޮށް، އަންދާސީ ހިސާބު ހުށަހެޅުމަށް ކައުންސިލުން ދަޢުވަތު ދީފައިވެއެވެ. ހަނދާނީ ބިނާގައި ޝަހީދު ޙުސައިންގެ ބަޑި އަދި ވަޒަން އަރާފައިވާ ފާރުކޮޅު ފެނިގެންދާނެއެވެ.
މި މަސައްކަތާ ގުޅޭ ޕްރީބިޑް މީޓިންގ އޮންނާނީ 13 އޮކްޓޯބަރ 2024 ވާ އާދިންތަ ދުވަހުގެ ހެނދުނު 10:30 ގައެވެ. މަސައްކަތަށް ރަޖިސްޓަރވުމުގެ ސުންގަޑިއަކީ 17 އޮކްޓޯބަރ 2024 ވާ ބުރާސްފަތި ދުވަހުގެ 10:30 އެވެ. އަދި އަންދާސީ ހިސާބު ހުށަހެޅުމުގެ ސުންގަޑިއަކީ 20 އޮކްޓޯބަރ 2024 ވާ އާދިއްތަ ދުވަހުގެ 10:30 އެވެ.
މި މަސައްކަތަށް ރަޖިސްޓަރ ވުމަށް ޝައުޤުވެރިވާ ފަރާތްތަކުން އޮންލައިން ފޯމެއް މެދުވެރިކޮށް ރަޖިސްޓަރ ވާންޖެހޭނެއެވެ. އިތުރު މަޢުލޫމާތު ހޯދުމަށް 1621 އަށް ގުޅުމަށް ނުވަތަ ވެބްސައިޓަށް ޒިޔާރާތްކުރުމަށް އެ ރަށު ކައުންސިލުން އަންގާފައިވެއެވެ.
ކުޅުދުއްފުށްޓަށް އުފަން ޝަހީދު ޙުސައިން އާދަމް އަކީ 3 ނޮވެމްބަރ، 1988 ގައި ދިވެހި ޤައުމުގެ ދިފާއުގައި ހަނގުރާމަކޮށް ޝަހީދުވި ދިވެހި ބަޠަލަކެވެ. އެދުވަހު ޤައުމަށް ކުރިމަތިވި ޓެރަރިސްޓް ހަމަލާގައި ވަޠަން ދިފާޢުކުރުމަށްޓަކައި އެންމެ ފާހަގަ ކޮށްލެވޭ ހިތްވަރުގަދަ ރައްދެއް ޓެރަރިސްޓުންނަށް ދިން ބޭފުޅަކީ ކޯޕްރަލް ޙުސައިން ޢާދަމެވެ.
