ދިވެހި ފުލުހުންގެ ޚިދުމަތުގެ ސައިބަރ ކްރައިމް ސެންޓަރުން އާންމުންނާ ގުޅުން ބަދަހިކޮށް، މަޢުލޫމާތު ފޯރުކޮށްދިނުމަށްޓަކައި އެ ސެންޓަރުގެ މީސްމީޑިއާ މަންސަތައް މިއަދު ތަޢާރަފުކޮށްފިއެވެ.
ސައިބަރ ކްރައިމް ސެންޓަރުން ތަޢާރަފުކޮށްފައިވަނީ ޔޫޓިއުބް، ޓިކްޓޮކް، ފޭސްބުކް އަދި އިންސްޓަގްރާމްގެ ރަސްމީ އެކައުންޓްތަކެވެ. މި މަންސަތައް މެދުވެރިކޮށް ރައްޔިތުން ހޭލުންތެރިކުރުވުމަށް ތަފާތު މަޢުލޫމާތުތައް ހިއްސާކުރާނެ ކަމަށް ފުލުހުންގެ ޚިދުމަތުން ބުނެއެވެ.
މި މަންސަތައް މެދުވެރިކޮށް ސައިބަރ ކްރައިމް މެދުވެރިކޮށް ހިންގާ ކުށްތަކުން ރައްކާތެރިވުމަށް އަޅަންޖެހޭ ފިޔަވަޅުތަކާއި، މިފަދަ ކުށްތައް ކުރާ މީހުން ބޭނުންކުރާ އެންމެ ފަހުގެ އުކުޅުތަކުގެ މަޢުލޫމާތު ވީޑިއޯ އަދި ޕޯސްޓުތައް މެދުވެރިކޮށް ހިއްސާކުރާނެ ކަމަށް ސައިބަރ ކްރައިމް ސެންޓަރުން މަޢުލޫމާތު ދެއެވެ. މި މަންސަތައް ތަޢާރަފުކޮށްފައިވަނީ އޮކްޓޫބަރު މަހާ ދިމާކޮށެވެ. އޮކްޓޫބަރު މަހަކީ އިންޓަނެޓު މެދުވެރިކޮށް ހިންގާ ކުށްތަކަށް ހޭލުންތެރިކަން އިތުރުކުރުމުގެ ބައިނަލްއަޤްވާމީ މަހުގެ ގޮތުގައި ފާހަގަކުރާ މަހެވެ.
ސައިބަރ ކްރައިމް ސެންޓަރުގެ މީސްމީޑިއާ މަންސަތައް ތަޢާރަފުކުރުމުގެ މަޤްޞަދަކީ އާންމުންނަށް ސައިބަރ ސަލާމަތާއި ރައްކާތެރިކަމާ ގުޅޭ މުހިންމު މަޢުލޫމާތުތައް ފޯރުކޮށްދީ، އިންޓަނެޓު މެދުވެރިކޮށް ހިންގާ ކުށްތަކުން ރައްކާތެރިވުމަށް ބޭނުންވާ ހުނަރުތައް ދަސްކޮށްދިނުމެވެ.
