ހޫނު ދުވަހަކަށް އެންމެ ކަމުދާނެ، ރޫހު ތާޒާ ކޮށްލެވޭނެ އެއްބުއިމަކީ ހަމަޔަގީނުންވެސް "ހޯމްމޭޑް މެންގޯ އައިސްކްރީމް" އެވެ.
މިއީ ޚަރަދު ކުޑަ އަދި ފަސޭހައިން ތައްޔާރުކޮށްލެވޭނެ ބުއިމެކެވެ.
[މި ރެސިޕީއިން ތައްޔާރު ކުރެވޭނީ: 7-6 މީހުންނަށް ވާވަރަށެވެ].
ބޭނުންވާ ތަކެތި:
އަނބު ސޯސް ހެދުމަށް
50 ގްރާމް ބޮޑުކޮށް ކޮށާފައި ހުރި އަނބު
1 މޭޒުމަތީ ސަމުސާ މާމުއި
އައިސްކްރީމް ހެދުމަށް
2 މޭޒުމަތީ ސަމުސާ އިންސްޓަންޓް ޑްރިންކް މެންގޯ ޖޫސް ޕައުޑަރ
¼ ޖޯޑު ފެން
1 ޖޯޑު ފޮނި ވިޕިންގް ކްރީމް
½ ޖޯޑު ގެރިކިރު
½ ސައިސަމުސާ ވެނީލާ އެސެންސް
ތައްޔާރު ކުރާނެ ގޮތް:
1. އައިސްކްރީމް މައްޗަށް އަޅާނެ އަނބު ސޯސް ތައްޔާރުކުރުމަށްޓަކައި 50 ގްރާމް ބޮޑުކޮށް ކޮށާފައި ހުރި އަނބާއި 1 މޭޒުމަތީ ސަމުސާ މާމުއި މިކްސަރަކަށް އެޅުމަށް ފަހު ރަނގަޅަށް އެއްވަންދެން ގިރާލާށެވެ.
2. ދެން މި އަނބު ސޯސް އައިސްއަލަމާރިއަށްލުމަށް ފަހު ފިނިކުރުމަށް ބަހައްޓާށެވެ.
3. ކުޑަ ތަށްޓަކަށް 2 މޭޒުމަތީ ސަމުސާ އިންސްޓަންޓް ޑްރިންކް މެންގޯ ޖޫސް ޕައުޑަރާއި ¼ ޖޮޑު ފެން އަޅާލުމަށް ފަހު ރަނގަޅަށް ގިރާލާށެވެ. އެއަށްފަހު މި ޖޫސް ތަށިވެސް އައިސްއަލަމާރީގައި 10 މިނެޓް ވަންދެން ފިނިކޮށްލުމަށް ބަހައްޓާށެވެ.
4. ދެން އައިސްކްރީމް ތައްޔާރުކުރުމަށްޓަކައި 1 ޖޯޑު ފޮނި ވިޕިންގް ކްރީމް ބޮޑު ބޯތަށްޓަކަށް އަޅާލާށެވެ. ވިޕިންގް ކްރީމް އެޅުމުގެ ކުރިން އަހަރުމެން ބޯތަށި ގާތްގަނޑަކަށް 15 މިނެޓް ވަންދެން އައިސްއަލަމާރިއަށްލާ ފިނިކޮށްލީމެވެ. މިހެން ފިނިކޮށްލުމުން ކްރީމް ވިޕްކުރަން ފަސޭހަވާނެއެވެ. (ބޭނުންވާނަމަ ފޮނި ވިމިންގް ކްރީމްގެ ބަދަލުގައި އާދައިގެ ވިޕިންގް ކްރީމްވެސް ބޭނުން ކުރެވިދާނެއެވެ. މިހެން ހަދާނަމަ ކްރީމް ވިޕް ކުރުމަށް ފަހު އައިސިންގް ޝުގަރ އަޅާފައި ފޮނިކޮށްލެވިދާނެއެވެ).
5. ދެން އަތުން ހިފާ ކަހަލަ ކަރަންޓު މިކްސަރެއް ބޭނުންކޮށްގެން 'ސްޓިފް ޕީކްސް' ހެދެންދެން ވިޕިންގް ކްރީމް ގިރާލާށެވެ. މިކަމަށް ނަގާނީ ގާތްގަނޑަކާށް 5 މިނެޓެވެ. (ސްޓިފް ޕީކްސް ހެދުނު ކަމަށް ބަލާނީ ގިރާއެތި ކްރީމް ގަނޑުގެ ތެރެއިން ނަގާއިރު އޭގައި ކްރީމްގެ ބައްޓަން ހިފެހެއްޓޭ ގޮތަށް ހަރުލާފައި ހުންނާނެ ވަރުވީމައެވެ. ސްޓިފް ޕީކްސް ހެދުމުން ބޯތަށި އެކޮޅު ކޮޅުން ޖަހާލިއަސް އޭގެއިން އެއްވެސް ކްރީމެއް ނުފައިބާނެއެވެ).
6. އެއަށްފަހު ކުރިން ހަދާލި ޖޫސްތަށި އައިސްއަލަމާރިން ނަގާށެވެ. ދެން އެ ޖޫހާއި ½ ޖޯޑު ގެރިކިރު އަދި ½ ސައިސަމުސާ ވެނީލާ އެސެންސް ވިޕްކޮށްފައި ހުރި ކްރީމް ތެރެއަށް އަޅާލާށެވެ.
7. ދެން އަނެއްކާވެސް އަތުން ހިފާ ކަހަލަ މިކްސަރެއް ބޭނުންކޮށްގެން އިތުރު 3 މިނެޓް ވަންދެން ނުވަތަ ކްރީމް އޮމާންކޮށް 'ސޮފްޓް ޕީކްސް' ހެދެންދެން ގިރާލާށެވެ. (ސޮފްޓް ޕީކްސް ހެދުނުކަމަށް ބަލާނީ ގިރާއެތި ކްރީމްގަނޑުގެ ތެރެއިން ނަގާއިރު އޭގައި ކްރީމް ނިކަން ފަސޭހައިން ސޮއްސައިގެން ދާވަރަށް ހަރުވެފައި ހުންނަ ވަރު ވީމައެވެ).
8. ދެން އެތެރެ ފުންކޮށް ހުންނަ ކަހަލަ ތަބަކަކަށް މި ކްރީމްގަނޑު އަޅާލާށެވެ. އަހަރުމެން ބޭނުންކުރީ 4 ގުނަ 8 އިންޗި ބޮޑު އަދި 2.5 އިންޗި ފުންމިނުގައި ހުންނަ ޕާން ފިހާ ކަހަލަ ތަބަކެކެވެ.
9. އައިސްކްރީމް ތަބައް އައިސްއަލަމާރީގެ ގަނޑު ކުރާ ބަޔަށްލުމަށް ފަހު ގާތްގަނޑަކަށް 10 މިނެޓް ވަންދެން ބަހައްޓާށެވެ.
10. ދެން އައިސްކްރީމް ކުޑަކޮށް ފިނުވުމުން އައިސްއަލަމާރިން ނަގުމަށް ފަހު ކުރިން ތައްޔާރުކޮށްލި އަނބު ސޯސް އޭގެ މައްޗަށް ސަމުސަލަކުން އަޅާލާށެވެ. ދެން ޗޮޕްސްޓިކެއް ނުވަތަ ދަނޑިކޮޅެއް ބޭނުންކޮށްގެން ސޯސްއިން މަރބަލް ޑިޒައިންއެއް އައިސްކްރީމްގެ މަތީގައި ހަދާލާށެވެ.
11. އެއަށްފަހު ތަބަކުގެ މަތީގައި ޕްލާސްޓިކް ވްރެޕް އަޅާލާށެވެ. މިހެން ހަދާއިރު ޕްލާސްޓިކް ވްރެޕް ހުންނަން ވާނީ އައިސްކްރީމްގެ މަތީގައި ތަތްވެފައި ހުންނަގޮތަށެވެ. (މިގޮތަށް ހެދުމުން އައިސްކްރީމްގެ މަތީގައި އައިސް ފަށަލައެއް ނުހެދޭނެއެވެ. އަދި ފަހުން އައިސްކްރީމް ސަމުސަލުން ނަގަން ފަސޭހަވާނެއެވެ).
12. ދެން އައިސްކްރީމް ތަބައް އައިސްއަލަމާރީގެ ގަނޑުކުރާ ބަޔަށްލުމަށް ފަހު މަދުވެގެން 7 ގަޑިއިރުވަންދެން ފިނިކޮށްލާށެވެ.
މައުލޫމާތު: ލޮނުމެދު.ކޮމް، ދިވެހި ހެދިކާ.ކޮމް، ދިވެހި ރެސިޕީ
