މިއަހަރުގެ ބައިނަލްއަޤްވާމީ މެންޓަލް ހެލްތް ދުވަސް ފާހަގަކުރުމުގެ ގޮތުން ސިއްހީ ވުޒާރާއިން ޚާއްޞަ ހިނގާލުމެއް އިއްޔެ ހުޅުމާލޭގައި ބާއްވައިފިއެވެ.
ނޭޝަނަލް މެންޓަލް ހެލްތް ޑިޕާޓްމަންޓުން އިސްނަގައިގެން ބޭއްވި މި ހިނގާލުމުގައި ނަފްސާނީ ދުޅަހެޔޮކަމާ ގުޅޭ މުހިންމު މަޢުލޫމާތުތަކެއް ހިއްސާކޮށް، ޚާއްޞަ މެސެޖްތަކެއް ވަނީ ފޯރުކޮށްދީފައެވެ. މި ހަރަކާތުގެ މައިގަނޑު މަޤްޞަދަކީ އާންމުންގެ މެދުގައި ނަފްސާނީ ދުޅަހެޔޮކަން ރަނގަޅުކުރުމަށް ކުރެވިދާނެ ކަންކަން އަންގައިދީ، އެކަމަށް ހޭލުންތެރިކަން އިތުރުކޮށް މަޢުލޫމާތު ފޯރުކޮށްދިނުމެވެ.
ސިއްހީ ވުޒާރާގެ އިސް މުވައްޒަފުންގެ އިތުރުން، ސަރުކާރުގެ އެހެނިހެން އޮފީސްތަކާއި ޑަބްލިޔު.އެޗް.އޯ މޯލްޑިވްސްގެ ފަރާތުންވެސް މި ހިނގާލުމުގައި ބައިވެރިވިއެވެ. މި ހަރަކާތުގައި ބައިވެރިވި ފަރާތްތަކުން ނަފްސާނީ ދުޅަހެޔޮކަމުގެ މުހިންމުކަން ފާހަގަކޮށް، އެކަމަށް އަހަންމިއްޔަތުކަން ދިނުމުގެ މުހިންމުކަން ވަނީ އާންމުންނަށް އަންގައިދީފައެވެ.
މި ހަރަކާތުގެ ތެރެއިން ނަފްސާނީ އެހީތެރިކަން ހޯދުމަށް ހިތްވަރުދީ، އެކަމަށް ހުރި ފުރުސަތުތަކާ ބެހޭ މަޢުލޫމާތު ވަނީ އާންމުންނާ ހިއްސާކޮށްފައެވެ.
