ޕޮލިސް ކުލަބާއި ބޮޑީބިލްޑިންގ އެސޯޝިއޭޝަން އޮފް މޯލްޑިވްސް (ބީބީއޭއެމް) އާއި ގުޅިގެން ފުލުހުންގެ މުއައްސަސާގެ ބަހާތަކަށް ހުޅުވާލައިގެން ބޭއްވި ފުލުހުންގެ ފުރަތަމަ ސްޕޯޓްސް ފިޒީކް ޗެމްޕިއަންޝިޕްގެ މިސްޓަރ ޕޮލިސްގެ މަގާމު ސީނިއަރ ސާޖަންޓް މިރާޙް އަބްދުﷲ ހޯދައިފިއެވެ.
އިސްކަންދަރު ކޮށީގައި ރޭ ބޭއްވި މުބާރާތުގައި މިސްޓަރ ޕޮލިސްގެ މަގާމު ހޯދި މިރާޙް ޢަބްދުﷲ ވަނީ މެންސް ސްޕޯޓްސް ފިޒީކް އަޕްޓު 180 ސެންޓިމީޓަރު ކެޓަގަރީންވެސް އެއް ވަނަ ހޯދާފައެވެ. މިކެޓަގަރީން ދެވަނައަށް ހޮވުނީ ސީނިއަރ ސާޖަންޓް އިނާޒް ޔޫސުފްއެވެ. އަދި ތިންވަނައަށް ހޮވުނީ ސަބް އިންސްޕެކްޓަރ އަލީ އަމަންއެވެ.
މުބާރާތް ފެށުމުގެ ރަސްމިއްޔާތު ޝަރަފްވެރިކޮށްދެއްވީ މިނިސްޓަރ އޮފް ހޯމްލޭންޑް ސެކިއުރިޓީ އެން ޓެކްނޯލޮޖީ ޢަލީ އިހުސާންއެވެ. މިރަސްމިއްޔާތުގައި ކޮމިޝަނަރ އޮފް ޕޮލިސް އަލީ ސުޖާޢު އާއި ޑެޕިއުޓީ ކޮމިޝަނަރ އޮފް ޕޮލިސް ފަ ރުހާދު ފިކުރީ އާއި ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން އާއި ފުލުހުންގެ އެގްޒެކެޓިވް އޮފިސަރުންނާއި ސީނިއަރ އޮފިސަރުންނާއި ބޮޑީބިލްޑިންގ އެސޯސިއޭޝަންގެ ރައީސް އާއި އެއެސޯސިއޭޝަންގެ އިސްވެރިންނާއި ފުލުހުންނާއި މުބާރާތުގައި ވާދަކުރި ފުލުހުންގެ އާއިލާ މެމްބަރުން ބައިވެރިވެލެއްވިއެވެ.
ފުލުހުން ބުނީ ރޭގެ ރަސްމިއްޔާތުގައި ވަނީ ބޮޑީބިލްޑިންގ ދާއިރާއިން ރަންވަނަތަކެއް ހާސިލްކޮށް، ގައުމަށާއި މުއައްސަސާއަށް ރީތިނަން ހޯދައިދީފައިވާތީ އެކަމަކުގެ އަގުވަޒަންކުރުމުގެ ގޮތުން ސަބް އިންސްޕެކްޓަރ އޮފް ޕޮލިސް މުހައްމަދު މޫސާ އާއި ކޮންސްޓަބަލް އަޒްނީން ރަޝާދު އަށް ހަނދާނީ ފިލައެއް އަރުވާފައިވާ ކަމަށެވެ. އަދި މިސްޓަރ ޕޮލިސް މުބާރާތް ބޭއްވުމުގައި އެކި ގޮތްގޮތުން އެހީތެރިވެދީފައިވާ ފަރާތްތަކުގެ އަގުވަޒަންކޮށް ފިލާ ދީފައިވާ ކަމަށްވެސް ފުލުހުން ބުންޏެވެ.
އެލިޔާ އިންވެސްޓްމަންޓް އިން ޓައިޓްލް ސްޕޮންސަރ ކޮށްފައިވާ "ޔަމަހާ މިސްޓަރ ޕޮލިސް" ގައި ހަތަރު ކެޓަގަރީއަކުން ފުލުހުން ވާދަކޮށްފައިވެއެވެ. އެގޮތުން ވާދަކޮށްފައިވާ ކެޓަގަރީ ތަކަކީ މެންސް ސްޕޯޓްސް ފިޒީކް އަޕްޓު 165 ސެންޓިމީޓަރު، މެންސް ސްޕޯޓްސް ފިޒީކް އަޕްޓު 170 ސެންޓިމީޓަރު، މެންސް ސްޕޯޓްސް ފިޒީކް އަޕްޓު 175 ސެންޓިމީޓަރު އަދި މެންސް ސްޕޯޓްސް ފިޒީކް އަޕްޓު 180 ސެންޓިމީޓަރެވެ.
މެންސް ސްޕޯޓްސް ފިޒީކް އަޕްޓު 165 ސެންޓިމީޓަރު ކެޓަގަރީން އެއްވަނަ ހޯދީ އަބްދުލް ރަހުމާން މިޖާދުއެވެ. މި ކެޓަގަރީން ދެވަނަ ސީނިއަރ ސާޖަންޓް މުހައްމަދު އަޒާމް ހޯދިއިރު ތިން ވަނަ އަށް ހޮވުނީ ސާޖަންޓް މުޖުތަބާ މުހައްމަދު އެވެ. މެންސް ސްޕޯޓްސް ފިޒީކް އަޕްޓު 170 ސެންޓިމީޓަރ ކެޓަގަރީން އެއްވަނަ ހޯދީ ސަބް އިންސްޕެކްޓަރ އޮފް ޕޮލިސް އަހުމަދު ކާމިލް އެވެ. މި ކެޓަރީން ދެވަނަ ސްޕްރިންޓެންޑެންޓް އޮފް ޕޮލިސް މޫސާ ރަޝީދު ހޮވުނުއިރު ތިން ވަނައަށް ހޮވުނީ ސަބް އިންސްޕެކްޓަރ އޮފް ޕޮލިސް އަޖުވަދު އަޝްރަފްއެވެ.
މެންސް ސްޕޯޓްސް ފިޒީކް އަޕްޓު 175 ސެންޓިމީޓަރު ކެޓަރީ ކާމިޔާބުކުރީ ސަބް އިންސްޕެކްޓަރ އޮފް ޕޮލިސް މުޙައްމަދު ޝާހިދުއެވެ. މި ކެޓަރީން ދެވަނައަށް ސީނިއަރ ސާޖަންޓް މުހައްމަދު އަޒްމީލް ހޮވުނުއިރު، ތިން ވަނައަށް ހޮވުނީ ކޮންސްޓަބަލް ހުމައިދު އަލީއެވެ.
ފުލުހުންގެ ފުރަތަމަ ސްޕޯޓްސް ފިޒީކް ޗެމްޕިއަންޝިޕްގެ މިސްޓަރ ޕޮލިސްގެ މަގާމަށް ހާސިލްކުރި މިރާހު އަށްވަނީ އެލިއާ އިންވެސްޓްމަންޓްގެ ފަރާތުން ހުށަހަޅާފައިވާ "ޔަމަހާ އެންމެކްސް 155" ގެ ސައިކަލެއް އިނާމުގެ ގޮތުގައި ލިބިފައެވެ. އަދި ބްލޭޒް ފިޓްނަސް ސެންޓަރުގެ ފަރާތުން ވަނީ ދެ އަހަރު ދުވަހުގެ ބްރޭންޑް އެމްބެސެޑަރުކަމާއެކު ޖިމް އޯލް އެކްސެސްގެ އިތުރުން އެޕަޓައިޓްގެ ފަރާތުން ތިން އަހަރުގެ ދުވަހުގެ ޑިސްކައުންޓް ކާޑެއް ހާދިޔާގެ ގޮތުގައި ދީފައިވެއެވެ. މި މުބާރާތުގައި ކެޓަގަރީތަކުން ވަނަތަކަށް ހޮވުނު އެތުލީޓުންނަށް ވަނީ ފައިސާގެ އިނާމާއި ގިފްޓް ވައުޗަރ ހަދިޔާގެ ގޮތުގައި ދީފައެވެ.
ފުލުހުންގެ ފުރަތަމަ ސްޕޯޓްސް ފިޒީކް ޗެމްޕިއަންޝިޕްގެ މިއަހަރުގެ މުބާރާތުގައި ހަތަރު ކެޓަރީގައި 12 ފުލުހުން ވާދަކޮށްފައިވެއެވެ. އަދި މި މުބާރާތް އަންނަ އަހަރު ބޭއްވުމަށް ހަމަޖެހިފައިވާއިރު، އަންނަ އަހަރުގެ މުބާރާތް ޖުލައި 4 ވަނަ ދުވަހު ބާއްވާނެކަމަށް ޕޮލިސް ކުލަބުގެ ރައީސް އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ރަޝީދު ވަނީ ރޭގެ ރަސްމިއްޔާތުގައި އިއުލާނު ކުރައްވާފައެވެ.
