އައްޑޫ ސިޓީގައި އަލަށް ޤާއިމުކުރެވޭ 32 މެގަވޮޓުގެ ސީޕީއެސް ޕަވަރ ޕްލާންޓުގެ ކޮންޓްރެކްޓަރ ކަމުގައިވާ ޑޮންގްފަންގ އިލެކްޓްރިކް ކޯޕަރޭޝަން ލިމިޓެޑްގެ މަންދޫބުންނާއި، އެ ފަރާތުގެ ފައިނޭންސިންގ ޕާޓްނަރ 'ސިޓިކް' ބޭންކުގެ ބޭފުޅުންނާއި، ފެނަކަ ކޯޕަރޭޝަންގެ މެނޭޖްމަންޓް ޓީމުގެ މެންބަރުން އައްޑޫ ސިޓީގައި އޮންސައިޓް އެސެސްމަންޓެއް ކުރިއަށް ގެންގޮސްފިއެވެ.
މި ޒިޔާރަތުގައި އެ ބޭފުޅުން އައްޑޫ ސިޓީގެ ޑެޕިއުޓީ މޭޔަރާއި، އައްޑޫ ސިޓީ ކައުންސިލްގެ މެންބަރުންނާއި، އައްޑޫ ސީޕީއެސްގެ ޓެކްނިކަލް މުވައްޒަފުންނާ ބައްދަލުކޮށް މަޝްވަރާކުރެއްވިއެވެ. އަދި މި ޓީމުން މިހާރު ހުރި ކަރަންޓު އުފައްދާ ތަނާއި، އަލަށް އިމާރާތްކުރަމުންދާ ތަން ވެސް ބައްލަވާލައްވާފައިވާކަމަށް ފެނަކައިން މަޢުލޫމާތުދެއެވެ.
އައްޑޫ ސިޓީގެ ކަރަންޓުގެ ހާލަތް ކުރިއަށް އޮތް 20 އަހަރަށް ބޭނުންވާ ވަރަށް ކެޕޭސިޓީ އިތުރުކުރުމަށ،ް ޑީސެލް ޕަވަރ ޖެނެރޭޝަން އެންޑް ޑިސްޓްރިބިއުޝަން ސިސްޓަމް ޕްރޮޖެކްޓް ފޯރް އައްޑޫ ސިޓީގެ ނަމުގައި ފެނަކައިން ވަނީ ޑޮންފެންގް އިލެކްޓްރިކް އިންޓަނޭޝަނަލް ކޯޕަރޭޝަނާ ހާވާލުކޮށްގެން ޒަމާނީ ޕަވަރ ހައުސް އެއް ޤާއިމު ކުރުމަށް ދާދިފަހުން އެއްބަސްވުމެއްގައި ސޮއިކުރައްވާފައިއެވެ،
