ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، ޓެކްސް އެޕީލް ޓްރައިބިއުނަލަށް ހަތަރު މެންބަރުން މިއަދު އައްޔަނުކުރައްވައިފިއެވެ.
ރައީސުލްޖުމްހޫރިއްޔާ މި ހަތަރު މެންބަރުން ޢައްޔަނުކުރައްވާފައިވަނީ ގާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ގާނޫނު) ގެ 56 ވަނަ މާއްދާގެ (ހ) ގެ (1) ވަނަ ނަންބަރުގައިވާ ގޮތުގެމަތީންނެވެ.
ޓެކްސް އެޕީލް ޓްރައިބިއުނަލަށް އައްޔަނުކުރައްވާފައިވާ ހަތަރު މެންބަރުންނަކީ
؛1. އަލްފާޟިލް ހަސަން ޒުހައިރު މުހައްމަދު، ގ. މާވާރުލު
2. އަލްފާޟިލް އިބްރާހީމް ޝަރީފް، ގ. އަލިޝާ
3. އަލްއުސްތާޒާ ޝިފްޒާ އަބްދުލްގައްޔޫމް، ގަސްދޮށުގެ، ގއ. ނިލަންދޫ
4. އަލްއުސްތާޒު އަބްދުލްޣަނީ މުހައްމަދު، ހ. ހޯސްޓްސައިޑް
ޓެކްސް އެޕީލް ޓްރައިބިއުނަލްގެ މެންބަރުކަމުގެ މަގާމަށް ކުރިމަތިލުމުގެ ފުރުސަތު ރައީސް އޮފީހުން ހުޅުވައިލައްވާފައި ވަނީ މިދިޔަ އޮގަސްޓް މަހުގެ 29 ވަނަ ދުވަހުއެވެ. އެއީ އެ ޓްރައިބިއުނަލްގައި އޭރު ހިމެނިވަޑައިގަންނަވާ ހަތަރު މެންބަރުންގެ މަގާމުގެ މުއްދަތު ހަމަވާތީއެވެ.
ރައީސް، ޓެކްސް އެޕީލް ޓައިބިއުނަލަށް މި ހަތަރު މެންބަރުން އައްޔަނުކުރެއްވުމުގެ ކުރިން، ރައްޔިތުންގެ މަޖިލީހުން ވަނީ މި ހަތަރު ބޭފުޅުންނަށް ރުހުން ދެއްވާފައެވެ.
