ގުޅީފަޅުން ގޯތި ލިބުނު މީހުންނަށް ބިން ކަނޑައެޅުމަށް ބާއްވާ ގުރުއަތުލުން އަންނަ އަންގާރަ ދުވަހު އޮންނާނެކަމަށް ހައުސިން މިނިސްޓްރީން އިއުލާން ކޮށްފިއެވެ. މި ގުރުއަތުލުން އޮންނާނީ ހެނދުނު 9:00 އިން ފެށިގެން ދަރުބާރުގޭ ރަންނަބަނޑޭރި މާލަމުގައެވެ.
މިނިސްޓްރީން މަޢުލޫމާތު ދީފައިވާ ގޮތުގައި، ގުޅީފަޅުން ޖުމްލަ 3،520 ގޯތި ދޫކުރެވޭނެއެވެ. މީގެ ތެރޭގައި ހިމެނެނީ 1250 އަކަފޫޓުން ފެށިގެން 3650 އަކަފޫޓާ ހަމައަށް ހުރި އެކި ބޮޑުމިނުގެ ގޯތިތަކެވެ.
ހައުސިން މިނިސްޓްރީން އިތުރަށް ފާހަގަކޮށްފައިވަނީ، ގުޅީފަޅުގެ ލޭންޑް ޔޫސް ޕްލޭނަށް އައިސްފައިވާ ބަދަލާ ގުޅިގެން، ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަނަށް ބަދަލު އައިސްފައިވާނެ ކަމަށެވެ. އަދި މިހާތަނަށް ގުޅީފަޅުން ބިން ހަވާލުނުކުރެވިވާ ފަރާތްތަކާއި ގިރާވަރު ފަޅުން ލިބިފައިވާ ގޯތިތައް ގުޅީފަޅަށް ބަދަލުކުރި މީހުންގެ ގޯތީގެ ގުރުއަތުލުންވެސް މި ފަހަރު ކުރިއަށްދާނެއެވެ.
ގުރުއަތުލުމަށް ހާޒިރުވާއިރު، ބިން ލިބޭ ފަރާތުގެ ބަދަލުގައި އެހެން ފަރާތަކުން ހާޒިރުވާން ބޭނުންނަމަ، ބިން ލިބޭ ފަރާތުގެ އިއުތިރާޒެއް ނެތް ކަމުގެ ލިޔުމަކާއި އައިޑީކާޑްގެ ކޮޕީ ގެންދަންވާނެ ކަމަށް މިނިސްޓްރީން އަންގާފައިވެއެވެ.
ގުރުއަތުލުން ނިމުމުން، ގޯތިތަކުގެ ރަޖިސްޓްރީއާއި ގޯތި ލިބޭ ފަރާތްތަކާއެކު ވެވޭ އެއްބަސްވުންތަކާ ގުޅޭ މަޢުލޫމާތު ފަހުން ހިއްސާކުރާނެ ކަމަށްވެސް ހައުސިން މިނިސްޓްރީން ވިދާޅުވެފައިވެއެވެ.
