ފެނަކަ ކޯޕަރޭޝަނުން "މަގޭ ސޯލާ ޕްރޮގްރާމް" ގެ ނަމުގައި ތިމާވެށްޓާ ރައްޓެހި ކަރަންޓުގެ ޚިދުމަތެއް ތައާރަފުކޮށްފިއެވެ.
މިއީ މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއާ ގުޅިގެން ފެނަކައިން ކުރިއަށްގެންދާ ޕްރޮގްރާމެކެވެ. މި ޕްރޮގްރާމްގެ ދަށުން ފެނަކައިން ޚިދުމަތްދޭ ހުރިހާ ގޭބިސީތަކަށް ސޯލާ ޕެނަލް ހަރުކުރުމުގެ ފުރުސަތު ހުޅުވާލާފައިވެއެވެ. އަދި މި ޕްރޮގްރާމްގެ ދަށުން ދޫކުރާނީ ތިން ކިލޯ ވޯޓާއި ފަސް ކިލޯ ވޯޓުގެ ސިންގަލް ފޭސް އަދި ތްރީ ފޭސް ސިސްޓަމްތަކެކެވެ.
ފެނަކައިން ވިދާޅުވެފައިވާ ގޮތުގައި، ދޫކުރާ ސިސްޓަމްތަކުގެ ސައިޒް ކަނޑައަޅާނީ ނެޓް މީޓަރިން އުސޫލުގެ ދަށުން ފެނަކަ ކޯޕަރޭޝަނަށް މި ހިދުމަތް ހޯދުމަށް ހުށަހަޅާ ގޭބިސީތައް ސާވޭ ކުރުމަށްފަހުގައެވެ.
މި ޕްރޮގްރާމްގެ ދަށުން ހަރުކޮށްދޭ ސޯލާ ސިސްޓަމްތަކަށް ފައިސާ ދެއްކޭނެ ދެގޮތެއް ފެނަކައިން ވަނީ ކަނޑައަޅާފައިއެވެ. އެއީ އެއްފަހަރާ ފައިސާ ދެއްކުން ނުވަތަ އިންސްޓޯލްމަންޓް އުސޫލުން 1، 3 ނުވަތަ 5 އަހަރަށް ބަހާލައަހާލައިގެން ފައިސާ ދެއްކުމެވެ. މި ޕްރޮގްރާމްގެ ދަށުން ދޫކުރާ ސޯލާގެ އަގުތަކަކީ 3 ކިލޯވޯޓު ސިސްޓަމެއް 45,000ރުފިޔާއަށް އަދި 5 ކިލޯވޯޓު ސިސްޓަމެއް 75,000 ރުފިޔާއަށެވެ.
މި ޚިދުމަތް ބޭނުންކުރަން ޝައުޤުވެރިވާ ފަރާތްތަކަށް ކިއު.އާރް ކޯޑް ސްކޭން ކުރުމަށްފަހު ނުވަތަ މަގޭ ސޯލާ ވެބްސައިޓަށް ޒިޔާރަތްކޮށްގެން އެޕްލިކޭޝަން ހުށަހެޅިދާނެއެވެ.
