އިމާރާތްކުރުމާއި ބިނާރާ ބެހޭ ވުޒާރާއިން ކުރިއަށްގެންދާ މުހިންމު މަޝްރޫޢުތަކާއި ގުޅޭ އެންމެ ފަހުގެ މަޢުލޫމާތު އެ ވުޒާރާގެ ވަޒީރު ޑރ. ޢަބްދުالله މުއްޠަލިބް ހިއްސާކުރައްވައިފިއެވެ.
ވަޒީރު މުއްޠަލިބް ވިދާޅުވި ގޮތުގައި މިއަހަރު މުޅިއަކު 38 މަޝްރޫޢުއެއް ވަނީ ނިންމާލެވިފައެވެ.
މީގެ ތެރޭގައި ހިމެނެނީ 29 ފެނާއި ނަރުދަމާ މަޝްރޫޢު، 4 ބަނދަރު މަޝްރޫޢު، 3 ގޮނޑުދޮށް ހިމާޔަތްކުރުމުގެ މަޝްރޫޢު، 1 ބިންހިއްކުމުގެ މަޝްރޫޢު އަދި 1 މަގުހެދުމުގެ މަޝްރޫޢުއެވެ. އަދި މިއަހަރުގެ 17 ނޮވެންބަރުގެ ނިޔަލަށް އިތުރު 21 މަޝްރޫޢުގެ ޢަމަލީ މަސައްކަތް ނިމޭނެކަމަށް ލަފާކުރެވޭ ކަމަށްވެސް އެމަނިކުފާނު ވިދާޅުވިއެވެ.
ވަޒީރު އިތުރަށް ފާހަގަކުރެއްވި ގޮތުގައި، އެމަނިކުފާނު އިމާރާތްކުރުމާއި ބިނާރާ ބެހޭ ވުޒާރާ ހިންގުމާ ހަވާލުވެވަޑައިގަތްއިރު، 1.72 ބިލިއަން ރުފިޔާގެ ޕެންޑިންގ ބިލްތައް ފިނޭންސް މިނިސްޓްރީއަށް ނުފޮނުވާ ހުރިކަން ފާހަގަކުރެއްވިއެވެ. ނަމަވެސް، ފެށުމަށް ތާވަލުކުރެވިފައިވާ މަޝްރޫޢުތަކާއި މިވަގުތު ކުރިއަށްދާ މަޝްރޫޢުތައް ހުއްޓާލުމުގެ ވިސްނުމެއް ސަރުކާރުގަ ނެތްކަމަށާއި، މަސައްކަތްތައް ތާވަލުކުރެވިފައިވާ ތަރުތީބަކުން ކުރިއަށްގެންގޮސް ނިންމާލުމަށް އުންމީދުކުރައްވާކަމަށް ވިދާޅުވިއެވެ.
ހަމައެއާއެކު، ތިލަމާލެ ބްރިޖުގެ އެންމެ ފަހުގެ ތަފްސީލީ ރިޕޯޓުވެސް ވަޒީރު ނޫސްވެރިންނާ ހިއްސާކުރެއްވިއެވެ. އަދި ކުރިއަށް އޮތްތަނުގައި ކޮންޓްރެކްޓަރ މެދުވެރިކޮށް އިތުރު ވަސީލަތްތައް ބޭނުންކޮށްގެން މަސައްކަތުގެ ދުވެލި އަވަސްކޮށް މަޝްރޫޢުތައް ކަނޑައެޅިފައިވާ ތާރީޙަށް ނިންމުމަކީ އެ ވުޒާރާގެ އަމާޒުކަމުގައިވެސް ވަޒީރު މުއްޠަލިބް ވިދާޅުވިއެވެ.
