މިނިވަން މުއައްސަސާތަކުގެ ތެރެއިން އެންޓި ކޮރަޕްޝަން ކޮމިޝަން (އޭސީސީ)އާއި އިލެކްޝަންސް ކޮމިޝަން (އީސީ)ގެ ރައީސުން އައްޔަން ކުރުމުގެ ބާރު ރައީސުލްޖުމްހުރިއްޔާއަށް ދިނުމަކީ އެ މުއައްސަސާތަކުން އެދިފައިވާ ކަމެއް ކަމަށް، ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް)ގެ މެންބަރު އަދި އީސީގެ ކުރީގެ ނައިބު ރައީސް އިސްމާއީލް ހަބީބް ވިދާޅުވެއްޖެއެވެ.
ހަބީބް މިހެން ވިދާޅުވީ އެކްސްގައި ރޭ ކުރެއްވި ޕޯސްޓެއްގައެވެ.
އެމަނިކުފާނުގެ ޕޯސްޓްގައި އިތުރަށް ވިދާޅުވީ އީސީ، އޭސީސީގެ ރައީސާއި ނާއިބު ރައީސް، ރައީސުލް ޖުމްހޫރިއްޔާ ޢައްޔަނު ކުރައްވާގޮތަށް މިހާރު މަޖިލީހަށް ހުށަހަޅުއްވާފައިވާ އިސްލާހަކީ 2023 ވަނަ އަހަރު މިނިވަން މުއައްސަސާތަކުން ރައީސުލްޖުމްހޫރިއްޔާގެ އަރިހަށާއި، އެޓަރނީ ޖެނެރަލްގެ އިތުރުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް އޭސީސީ، އީސީ، އެޗްއާރުސީއެމް އަދި ސީއެއްސީގެ މެންބަރުން ހުށަހެޅި ޕޭޕަރެއްގައި ހިމެނިފައިވާ ކަމެއް ކަމަށެވެ.
އަދި މިއީ ދުނިޔޭގެ ކުރިއަރާފައިވާ އެމެރިކާ ފަދަ ގައުމުތަކުންވެސް އެކަން ކުރަމުން އަންނަގޮތް ކަމަށްވެސް ހަބީބް ވިދާޅުވިއެވެ.
އޭސީސީ އަދި އީސީގެ ރައީސްއާއި ނާއިބު ރައީސްގެ މަގާމު ސީދާ ރައީސްއަށް އައްޔަނުކުރެވޭ ގޮތަށް ދެ ގާނޫނަކަށް އިސްލާހު ގެންނަން މަޖިލީހަށް ވަނީ ހުށަހަޅައިފަ އެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި އެ އިސްލާހުތަކަށް އިދިކޮޅުން ވަނީ ވަރަށް ބޮޑަށް ފާޑުކިޔައިފަ އެވެ.
ނަމަވެސް ސަރުކާރު މެމްބަރުން ވަނީ އެ އިސްލާހުތައް ދިފާއުކޮށްފައެވެ.
