މެކްސިކޯގައި މި އަހަރު އޮންނަ "މިސް ޔުނިވާސް" ގައި ރާއްޖެ ތަމްސީލުކުރަން ދިވެއްސަކު ދިއައީ ސަރުކާރުން ފޮނުވައިގެން ނޫން ކަމަށް މިނިސްޓްރީ އޮފް ޔޫތު އެމްޕަވަރމެންޓް, އިންފޮމޭޝަން އެންޑް އާޓްސް އިން ހާމަކޮށްފިއެވެ.
ރާއްޖެއަށް ނިސްބަތްވާ, އުމުރުން 21 އަހަރުގެ މަރިޔަމް ޝައިނާ މެކްސިކޯގެ މިސް ޔުނިވާސްގައި ބައިވެރިވުމަށް ދިއުމާ ގުޅިގެން ޔޫތު މިނިސްޓްރީއިން ނެރުނު ބަޔާނުގައި ވަނީ, ޝައިނާ އެ މުބާރާތަށް ފޮނުވީ ސަރުކާރުން ކަމަށް ބުނެ މީސްމީޑިއާގައި ދައުރުވަމުންދާ ހަބަރުތައް ދޮގުކޮށްފައެވެ.
އޭގެ އިތުރުން, ދިވެހިންނަކީ ސައްތައިން ސައްތަ މުސްލިމް ގައުމަކަށްވާއިރު ދީނާއި އަގީދާ އާއި ދިވެހިންގެ ޒަމާންވީ ސަގާފަތާ ނުގުޅޭ ހަރަކާތްތަކާއި މުބާރާތްތައް ބޭއްވުމާއި އެ ފަދަ މުބާރާތްތަކުގައި ބައިވެރިވުމަކީ ދިވެހި ސަރުކާރުން ބަލައިގަންނާނެ ކަމެއް ނޫން ކަމަށް ޔޫތު މިނިސްޓްރީއިން ނެރުނު ބަޔާނުގައި ހާމަކުރިއެވެ.
އެ މިނިސްޓްރީގެ މި ބަޔާނުގައި ވަނީ, ޒަމާންވީންސުރެ ދިވެހިންގެ ތެރޭގައި އޮންނަ އަހްލާގީ މިންގަނޑުތަކާއި އުސޫލުތަކާ ހިލާފު ކަންކަމުގައި, ރާއްޖެ ތަމްސީލު ކުރުމުގެ ނަމުގައި ދިވެއްސަކު އެ ފަދަ ހަރަކާތަކަށް ދިޔުން ސަރުކާރުން ކުށްވެރި ކުރާ ކަން ހާމަކޮށްފައެވެ.
މި ބަޔާނުގައި ސަރުކާރުން ވަނީ ރާއްޖެ ތަމްސީލު ކުރުމުގެ ނަމުގައި އަހްލާގީ މިންގަނޑުތަކުން ބޭރުވާ އެއް ވެސް ހަރަކާތެއްގައި ސަރުކާރުގެ ފަރާތުން ދިވެއްސަކު ބައިވެރިނުކުރާނެ ކަމުގައި ޔަގީން ކަންދީ, އެ ފަދަ ހަރަކާތެއްގައި ސަރުކާރުން ދިވެއްސަކު ބައިވެރިކުރުވާނެ ކަމަށް ދޭހަވާ ގޮތަށް ދޮގު ހަބަރު ނުފެތުރުމަށް އިލްތިމާސް ކޮށްފައެވެ.
