ރާއްޖޭގައި އޮންލައިންކޮށް ޖުވާކުޅުން ހުއްޓުވުމަށްޓަކައި ގާނޫނަށް އިސްލާހުތައް ގެންނަވާނެ ކަމަށް ބަންޑާރަނައިބު އަޙުމަދު އުޝާމް ވިދާޅުވެއްޖެއެވެ. މި ބަޔާން ދެއްވާފައިވަނީ ރައީސް އޮފީހުގައި މިއަދު ބޭއްވުނު ނޫސްވެރިންގެ ބައްދަލުވުމެއްގައެވެ.

އުޝާމް ވިދާޅުވި ގޮތުގައި، ރާއްޖޭގައި ފުޅާ ދާއިރާއެއްގައި އޮންލައިންކޮށް ޖުވާ ކުޅުން އާންމުވެފައިވާކަން ފާހަގަކުރެވިފައިވެއެވެ. މި މައްސަލަ ހައްލުކުރުމަށްޓަކައި ގާނޫނަށް އިސްލާހުތައް ގެންނަން ޖެހޭކަމަށް ސަރުކާރުން ދެކޭ ކަމަށާއި، އެ އިސްލާހުތައް ގެންނާނެ ކަމަށް އުޝާމް ވަނީ ކަށަވަރުކޮށްދެއްވާފައެވެ.

މިދިޔަ ޖުލައި މަހުގެ ތެރޭގައި ފުލުހުން ވަނީ އޮންލައިން ޖުވާ ކުޅުމަށް ބޭނުންކުރާ ހަތަރުވަރަކަށް ސައިޓު ބްލޮކް ކުރުމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އަށް ހުށަހަޅާފައެވެ. މިކަމުގެ ނަތީޖާއެއްގެ ގޮތުން، ބައެއް ސައިޓުތައް ވަނީ ބްލޮކް ކުރެވިފައެވެ.

އޮންލައިންކޮށް ޖުވާ ކުޅުމުގެ ސަބަބުން ބައެއް މީހުން ގިނަ އަދަދެއްގެ ފައިސާ ހޯދާކަން ވެސް ފާހަގަކުރެވިފައިވެއެވެ. މީގެ އިތުރުން، ޓެލެގްރާމާއި އެހެނިހެން ސޯޝަލް މީޑިއާ ޕްލެޓްފޯމްތައް މެދުވެރިކޮށް ޖުވާ ކުޅޭ ވެބްސައިޓްތައް ޕްރޮމޯޓް ކުރުން ވެސް ވަނީ އާންމުވެފައެވެ.

މި މައްސަލައާ ގުޅިގެން ސަރުކާރުގެ ތެރޭގައި މަޝްވަރާތައް ކުރެވެމުންދާ ކަމަށް ބަންޑާރަނައިބު އުޝާމް ވިދާޅުވިއެވެ. އަދި މިއީ ގާނޫނަށް އިސްލާހު ގެނެސްގެން ހައްލުކުރަންޖެހޭ މައްސަލައެއްކަން އޭނާ ފާހަގަކުރެއްވިއެވެ.

މި ފިޔަވަޅުތަކަކީ ރާއްޖޭގައި އިންޓަރނެޓް މެދުވެރިކޮށް ކުރެވޭ އެހެނިހެން ގާނޫނާ ޚިލާފު ޙަރަކާތްތައް ހުއްޓުވުމަށް އެޅޭ ފިޔަވަޅުތަކުގެ ބައެއް ކަމަށްވެސް ބެލެވެއެވެ. މިގޮތުން، މިދިޔަ އަހަރު ފަހުކޮޅު ބަރަހަނާ ވެބްސައިޓްތައް ވެސް ރާއްޖޭގައި ބްލޮކް ކުރަން ވަނީ ފަށާފައިއެވެ.

އިތުރު ލިޔުންތައް ސައިބަރކްރައިމް