އިސްލާމީ ފަތުވާދޭ އެންމެ މަތީ މަޖިލީހުގެ އައު ވެބްސައިޓް އިފްތިތާހްކޮށްފައެވެ. ވެބްސައިޓް އިފްތިތާހްކުރެއްވީ އިސްލާމީ ކަންތައްތަކާ ބެހޭ ވުޒާރާގައި މިއަދު ބޭއްވުނު ޚާއްޞަ ރަސްމިއްޔާތެއްގައި އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް އެވެ.
މި ރަސްމިއްޔާތުގައި ވާހަކަފުޅު ދައްކަވަމުން އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް ވިދާޅުވީ، އިސްލާމީ ފަތުވާދޭ އެންމެ މަތީ މަޖިލީހުގެ ކަންކަން ހަރުދަނާކޮށް ކުރިއަށް ގެންދިއުމަކީ މި ސަރުކާރުން ވަރަށް އިސްކަމެއް ދެއްވާ ކަމެއް ކަމަށެވެ.
ވަޒީރު އިތުރަށް ވިދާޅުވި ގޮތުގައި، ރައީސް ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު، ފަތުވާ މަޖިލީހުގެ މެމްބަރުންގެ ޢަދަދު ޤާނޫނީ ގޮތުން ފުރިހަމަވާންޖެހޭ ގޮތަށް ތަރުތީބުކުރައްވާ، ފަތުވާ މަޖިލީހުގެ މަސައްކަތްތަކަށް ސަރުކާރުގެ ފަރާތުން ދޭންޖެހޭ ހުރިހާ އެއްބާރުލުމަކާއި އެހީތެރިކަމެއް ދެއްވުމަށް ވުޒާރާއަށް އަންގަވާފައިވެއެވެ. އަދި ވުޒާރާގެ ފަރާތުން ފަތުވާ މަޖިލީހަށް ލިބެންޖެހޭ ހުރިހާ އެއްބާރުލުމެއް ދެއްވާނެކަމަށްވެސް ވަޒީރު ވިދާޅުވިއެވެ.
ފަތުވާ މަޖިލީހުގެ އާ ވެބްސައިޓް އިފްތިތާހުވެގެން ދިއުމަކީ ފަތުވާގެ ނިޒާމަށް އަންނާނެ ހެޔޮ ބަދަލެއްކަމަށް ވަޒީރު ފާހަގަކުރެއްވިއެވެ. އަދި ޢިލްމީ މަސައްކަތްތައް ފަސޭހަކަމާއެކު އާންމުންނަށް ލިބޭނެ އިންތިޒާމް ހަމަޖެއްސެވުމަކީ މުހިންމުކަމެއްކަމަށް ދެކިލައްވާކަމަށްވެސް އެމަނިކުފާނު ވިދާޅުވިއެވެ. މީގެއިތުރުން، ފަތުވާ ނިޒާމު ހަރުދަނާކުރުމަކީ ބޮޑެތި އިސްލާމީ ޤައުމުތަކުންވެސް ވަރަށް އިސްކަމެއް ދެއްވާކަމެއްކަމަށާއި، ރާއްޖެއިންވެސް މި މަގުން މަސައްކަތްކުރަމުން ގެންދަވާކަމަށް ވަޒީރު ވިދާޅުވިއެވެ.
އައު ވެބްސައިޓުން އިސްލާމީ ފަތުވާދޭ އެންމެ މަތީ މަޖިލީހުން ނެރުއްވާފައިވާ ފަތުވާތަކާއި، އިސްތިރާޝީ ލަފާތަކާއި، ފަތުވާ ފޮތްތައް ހިމެނޭ އޮންލައިން ލައިބްރަރީއަކާއި ފަތުވާ މަޖިލީހާ ގުޅޭ އެންމެ ފަހުގެ ޚަބަރާއި މަޢުލޫމާތު ލިބިވަޑައިގަންނަވާނެކަމަށް އިސްލާމީ ކަންތައްތަކާ ބެހޭ ވުޒާރާއިން މައުލޫމާތުދެއެވެ. މި ވެބްސައިޓް އިފްތިތާހުކުރުމާއެކު، އާންމު ރައްޔިތުންނަށް ފަސޭހައިން ދީނީ މަޢުލޫމާތު ހޯދުމުގެ މަގު ތަނަވަސްވެގެންދާނެއެވެ.
