އަންނަ އަހަރަށް ލަފާކޮށް ސަރުކާރުން މިއަދު މަޖިލީހަށް ހުށަހެޅި ބަޖެޓުގައި ދިވެހިި ސިވިލް ސާވިސް މުއައްޒަފުންގެ މުސާރަ ބޮޑުކުރުމަށް ނިންމައި ބަޖެޓްގައި އެފައިސާ ހިމަނައިފިއެވެ.
ރައްޔިތުންގެ މަޖިލީހަށް ބަޖެޓް ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ، ކުރިއަށް އޮތް އަހަރުގެ ބަޖެޓުގައި ސިވިލް ސާވިސް މުވައްޒަފުންގެ ތެރެއިން މިހާތަނަށް ޕޭ ހާމަނައިޒްކޮށްފައިނުވާ ހުރިހާ މުވައްޒަފުންނާއި ޖުޑީޝަރީގެ މުވައްޒަފުންގެ މުސާރަތަކަށް ބަދަލުގެނެސް ހާމަނައިޒްކުރަން 500 މިލިއަން ރުފިޔާ ހިމަނާފައި ވާނެ ކަމަށެވެ.
އަދި އެނޫން އެހެން ހުރިހާ މުވައްޒަފުންގެ މުސާރަތަކަށް 2026 ވަނަ އަހަރު ބަދަލުގެނައުމަށް ރާވާފައިވާކަމަށް މާލީ ވަޒީރު ވިދާޅުވިއެވެ.
ސަރުކާރުން އަންނަ އަހަރަށް ލަފާކޮށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ. މިއީ މިދިޔަ އަހަރުގެ ނޮވެމްބަރު މަހު ރާއްޖޭގެ ރައީސުލް ޖުމްހޫރިއްޔާ ކަމުގެ މަގާމާ ޑޮކްޓަރ މުހައްމަދު މުއިއްޒު ހަވާލުވެވަޑައިގަތުމަށްފަހު އެމަނިކުފާނުގެ ސަރުކާރުން މަޖިލީހަށް ހުށަހެޅު ފުރަތަމަ ބަޖެޓެވެ. ކުރީގެ ރައީސް އިބްރާހިމް މުހައްމަދުގެ ސާލިހުގެ ސަރުކާރުން މިއަހަރަށް ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ.
އަންނަ އަހަރުގެ ބަޖެޓްގުގައި ރިކަރަންޓް ހަރަދުގެ ގޮތުގައި 35.8 ބިލިއަން ރުފިޔާ ވަނީ ހިމަނާފައެވެ. އަދި ކެޕިޓަލް ހަރަދުގެ ގޮތުގައި ބަޖެޓްގައި ޖަހާފައިވަނީ 13.4 ބިލިއަން ރުފިިޔާއެވެ. ޕީއެސްޕީއައި މަޝްރޫޢުތަކަށް ކަނޑައަޅާފައިވަނީ 12.4 ބިލިއަން ރުފިޔާއެވެ.
