ނިމިިދިޔަ އެމްޑީޕީ ސަރުކާރުން ސިޔާސީ މަޤްސަދުތައް ހާސިލް ކުރުމަށް އެއްވެސް ރޭވުންތެރިކަމެއް ނެތި 8.8 ބިލިޔަން ރުފިޔާ ޗާޕުކުރި ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ކުރިއަށް އޮތް 2025 ވަނަ އަހަރަށް ލަފާކޮށް ސަރުކާރުގެ ފަރާތުން ރައްޔިތުން މަޖިލީހަށް މިއަދު ބަޖެޓް ހުށަހެޅުމަށް ދެއްކެވި ވާހަކަފުޅުގައެވެ.
މިނިސްޓަރ ޒަމީރު ވިދާޅުވީ އިގްތިސާދު އިތުރަށް ފުޅާކުރުމުގެ ނަމުގަޔާއި ރައްޔިތުންނަށް ދޭންޖެހޭ ހިދުމަތްތައް ދިނުމުގެ ނަމުގައި ދިވެހި ދައުލަތުގެ އާމްދަނީއާއި ނުބައްދަލު މިންވަރަކަށް ސަރުކާރުގެ ޚަރަދުތައް އެމްޑީޕީ ސަރުކާރުން އުފުލިކަމަށެވެ. އެމަނިކުފާނު މިސާލެއްގެ ގޮތުގައި ދެއްކެވީ އެމްޑީޕީއިން ވެރިކަމާ ހަވާލުވުމުގެ ކުރިން ދައުލަތުގެ ބަޖެޓު 28.2 ބިލިއަން ރުފިޔާގައި ހުރިއިރު 2023 ވަނަ އަހަރު 50.9 ބިލިއަން ރުފިޔާއަށް ދައުލަތުގެ ބަޖެޓް އެމްޑީޕީއިން އުފުލާލި މަންޒަރެވެ. މިނިސްޓަރ ޒަމީރު ވިދާޅީ މީގެ ނަތީޖާއަކީ މިއަދު ދައުލަތުގެ އާމްދަނީގެ ގޮތުގައި ލިބޭ ކޮންމެ 100 ރުފިޔާއަކުން 23 ރުފިޔާއަކީ އިންޓަރެސްޓު ރޭޓުގައި އަނބުރާ ދައްކަން ޖެހޭ ގޮތަށް ނެނގޭ ދަރަނިކަމަށެވެ.
މީގެ އިތުރުން މިނިސްޓަރ ޒަމީރު ވިދާޅުވީ ދައުލަތުގެ މާލިއްޔާއަށް އާމްދަނީ ލިބޭނެ ގޮތެއް ރޭވުމެއްނެތި، ދަރަނި މަތިން ދަރަނި ނަގައި އެމްޑީޕީ ސަރުކާރުން ގައުމުގެ ހިންގުމުގެ ނަތީޖާއަކީ ކޮންޓްރެކްޓަރުންގެ ބިލުތަކަށް ފައިސާ ނުދެއްކި ދައުލަތަށް ބޮޑު ބުރައެއް އުފުލަން މިއަދު ޖެހިފައިވުން ކަމުގައި މިނިސްޓަރ ޒަމީރު ވިދާޅުވިއެވެ.
