އިންތިޚާބީ ރައީސް ޑޮނަލްޑް ޓްރަމްޕް ކެބިނެޓްގެ އެންމެ މުހިންމު މަގާމު ކަމަށްވާ ދިފާއީ ވުޒާރާއަށް އޭނާ އައްޔަން ކުރައްވާ ފަރާތަކީ ސެނެޓުން ގިނަ ސުއާލުތައް ކުރިމަތި ކުރުވާނެ ފަރާތެއް ކަމަށް ބެލެވެއެވެ.
ދިފާއީ ވުޒާރާއަށް އައްޔަން ކުރެއްވުމަށް ޓްރަމްޕް ނިންމަވާފައި ވަނީ، ފޮކްސް ނިއުސްގެ ޕްރޮގްރާމު ހޯސްޓުކުރައްވާ އަދި ސިފައިންގެ ތެރޭގައި ކުރިން ޚިދުމަތް ކުރައްވާފައިވާ ވެޓެރަން ޕީޓް ހެގްސެތު އެވެ.
އައު ސެކްރެޓަރީ އޮފް ޑިފެންސްއަކީ، އިރާގާއި އަފްޣާނިސްތާނުގައި ސިފައިންގެ ނޭޝަނަލް ގާޑްގައި މަސައްކަތް ކުރެއްވި ބޭފުޅެކެވެ. އޭނާއަކީ މިލިޓަރީ ޚިދުމަތުގައި ރެކޯޑެއް އޮތް އަދި ގިނައިން ވިކުނު ފޮތެއް ލިޔުއްވި ބޭފުޅެކެވެ.
"ޕީޓަކީ ހަރުދަނާ، ތޫނުފިލި އަދި އެމެރިކާގެ މަސްލަހަތަށް އިސްކަން ދެއްވާ ހަގީގީ ވިސްނުމުގެ ބޭފުޅެއް،" ޓްރަމްޕް ވިދާޅުވި އެވެ.
އެމެރިކާގެ ދިފާއީ ވުޒާރާ ސާފު ކުރުމަކީ ޓްރަމްޕްގެ އަމާޒެކެވެ. އޭނާގެ ފުރަތަމަ ދައުރުގައި ބައެއް ތަންތަނުން އމެރިކާ ސިފައިން ބާލަން އޭނާ ހުށަހެޅުއްވި ހުށަހެޅުމަށް އެތާގެ ބޮޑުން ދެކޮޅު ހެއްޖެވެ. މިފަހަރު އެކަން ތަކުރާރުވާކަށް އޭނާ ބޭނުންފުޅެއް ނުވެއެވެ. އަދި އެމެރިކާގެ މަގުތަކުގައި މުޒާހަރާ ކުރާ މީހުންނާ ދެކޮޅަށް ސިފައިން ނެރެން ބޭނުންވެގެން ޓްރަމްޕް މަސައްކަތް ކުރެއްވުމުން އެކަމަށްވެސް ޑިފެންސް ޑިޕާޓްމަންޓުން ދެކޮޅު ހެއްޖެވެ. ޓްރަމްޕް ބޭނުންފުޅު ވަނީ ސިފައިން ހަތިޔާރާއެކު މަގުމައްޗަށް ނިކުމެ މުޒާހަރާ ކުރާ މީހުންނާ ކުރިމަތލާށެވެ.
