ފަސް އަހަރުގެ ޖަލު ހުކުމެއް ތަންފީޒުކުރަމުން އަންނަ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ކުރިއަށް އޮތް 2023 ވަނަ އަހަރުގެ ރިޔާސީ އިންތިހާބުގައި ވާދަނުކުރެއްވިއްޖެ ހާލަތެއްގައި، އިދިކޮޅު ކެންޑިޑޭޓެއްގެ ގޮތުގައި ވާދަކުރުމަށް ޝައުގުވެރިކަން ހުރިކަން ކުރީގެ ރައީސް ޑރ. މުހައްމަދު ވަހީދު ހަސަން ހާމަކުރައްވައިފިއެވެ.
އެހުންތެރިންގެ ސުވާލުތަކަށް ހުޅުވާލައިގެން ދައުލަތުގެ މީޑިއާ، ދިވެހިރާއްޖޭގެ އަޑުން ރޭ ގެނެސްދިން "އަހާށޭ ބުނާނަން" ޕްރޮގްރާމްގައި ވާހަކަފުޅު ދައްކަވަމުން ވަޙީދު ވިދާޅުވީ، ޔާމީން އަށް 2023 ވަނަ އަހަރު އޮންނަ ރިޔާސީ އިންތިޚާބުގައި ވާދަ ނުކުރެވޭ ޙާލަތެއް އައިސްފިނަމަ އަދި ޕްރޮގްރެސިވް ކޮންގްރެސް ކޯލިޝަނުން އެމަނިކުފާނު ބަލައިގެންފިނަމަ އިންތިޚާބަުގައި ވާދަކުރައްވަން ޝަޢުގުވެރިވެވަޑައިގަންނަވާކަމަށެވެ
"ރައީސް ޔާމީނަށް ކުރިމަތި ނުލެވޭ ހާލަތެއް ނަމަ ޕާޓީން ނިންމާނީ ގައުމަށް އަދި ޕާޓީއަށް ވެސް އެންމެ ރަނގަޅަށް. އެ އެންމެ ރަނގަޅު ގޮތަކީ އަޅުގަނޑު އެ މަގާމަށް ކުރިމަތިލުން ކަމަށް ވާ ނަމަ އެއީ އެންމެ ރަނގަޅު ގޮތް" ވަހީދު ވިދާޅުވިއެވެ.
އިންތިޚާބު ކައިރިވެ ޔާމީނަށް ވާދަނުކުރެއްވިއްޖެ ނަމަ ބަދަލުގައި ރައްޔިތުންނަށް ދައްކާނީ ކޮން ބޭފުޅެއްތޯ ނިންމުމުގެ ބާރު އޮތީ ޕީޕީއެމް އަދި ޕީއެންސީ ކައުންސިލަށް ކަން ފާހަގަކުރައްވައި ވަހީދު އިތުރަށް ވިދާޅުވީ އެފަދަ ހާލަތެއް ދިމާވެއްޖެ ނަމަ ޕާޓީގައި ޕްރައިމަރީއެއް ބާއްވަވާނެ ކަމަށެވެ.
ރައީސް ވަހީދު އިތުރަށް ވިދާޅުވީ އެމަނިކުފާނު ޕްރައިމަރީގައި ވާދަކުރައްވާނަންތޯ ނޫންތޯ ދަންނަވަން އަދި އަވަސް ކަމަށާއި ވެވުނު ގޮތަކަށް ގައުމަށް ޚިދުމަތް ކުރުމަށް ތައްޔާރަށް ހުންނެވި ކަމަށެވެ.
ސިޔާސީ ހަރަކާތްތަކުގައި ދުރުގައި ދުވަސްކޮޅަކު ހުންނެވުމަށްފަހު ވަހީދު ވަނީ މިދިޔަ އަހަރުގެ އޭޕްރީލް މަހުގެ ތެރޭގައި އިދިކޮޅު ޕީޕީއެމާއި ގުޅިވަޑައިގެންފައެވެ. އަަދި އެމަނިކުފާނަކީ މިހާރު އިދިކޮޅު ޕީޕީއެމްގެ އެޑްވައިޒަރުވެސްމެވެ.
