ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު، މ. ދިއްގަރަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފިއެވެ.
މި ދަތުރުފުޅުގައި އެކަމަނާ ވަނީ، ދުނިޔޭގެ ހަކުރުބަލީގެ ދުވަސް ފާހަގަކުރުމަށް އެ ރަށުގައި ކުރިއަށްގެންދިޔަ ޖަލްސާ ޝަރަފުވެރިކޮށްދެއްވާފައެވެ.
އަދި ދިއްގަރުގެ 16 އަހަރުން މަތީގެ އާބާދީގެތެރެއިން ހަކުރުބަލި ޖެހުމުގެ ފުރުސަތު ބޮޑު ކަމަށް ލަފާކުރެވޭ އާބާދީއަށް އަމާޒުކޮށް، "ލައިފްސްޓައިލް އިންޓަވެންޝަން ޕްރޮގްރާމް"ގެ ނަމުގައި ފަރުމާކޮށްފައިވާ ހާއްސަ ޕްރޮގްރާމް އެކަމަނާ ވަނީ އިފްތިތާހުކޮށްދެއްވާފައެވެ.
މި ދަތުރުފުޅުގައި ދިއްގަރު ސިއްހީ މަރުކަޒުގައި ގާއިމުކުރި ނޮން-ކޮމިއުނިކަބަލް ޑިޒީޒް ކްލިނިކް ނުވަތަ ގައިންގަޔަށް ނާރާ ބަލިތަކާ ގުޅޭ ކްލިނިކްވެސް އެކަމަނާ ވަނީ ރަސްމީކޮށް ހުޅުއްވައިދެއްވާފައެވެ.
ބައިނަލްއަގުވާމީ ގޮތުން، ހަކުރުބަލީގެ ދުވަސް ފާހަގަކުރަނީ ނޮވެމްބަރު މަހުގެ 14 ވަނަ ދުވަހުއެވެ. މިއަހަރުގެ ހަކުރު ބަލީގެ ދުވަހަށް އިންޓަނޭޝަނަލް ޑައިބިޓީސް ފެޑަރޭޝަނުން ކަނޑައަޅުއްވާފައިވާ ޝިއާރު ކަމަށްވާ، "ހަކުރުބައްޔާއި ދުޅަހެޔޮކަން" މި ޝިއާރުގެ ދަށުން ނަފްސާނީ، ޖިސްމާނީ އަދި އިޖުތިމާއީ ދުޅަހެޔޮކަމަށް އިސްކަންދެވޭނެއެވެ.
